NGEA ni leader rangko gallone tol•e tol•e aganronga: Brithen M. Sangma, Secretary NGEA

04 April 2022, Tura: Batang gimin 2020-2021 bilsirangonin NGEA ni gita bilsi gittam ong•na sipiloba  dormahako man•jaenga ine NGEA-ni Secretary parakataha. GHADC tangka paisa rangko indakpile man•genchimoba maini a•sel dormahako kam ka•giparangna on•jaenga.  Kam ka•a bewalrangko am•sandie, tangka jakkalsretako u•ie aganoba public, GHADC-ni officer-rang, MDC aro CM Conrad oni kingkingan duk mikchi sintearangko bebe ra•ja indiba batesa NGEA-ni leader-rangko gallone tol•et ol•e aganronga ine koborna agandapataha.

“NGEA-ni gita GHADC-ko Audit ka•china Pa Benedict R Marak-ni CEM ong•mitingo dabiani ja•manosa da•o kakketgipa reportko an•tangna  nie ra•na gitaba man•enga. Dao•roro GHADC-o kam ka•enggiparangni neng•skime kam ka•ako ka•a minggija, dangdike on•gija mikbokani gisikchi A•chik jatni office-ko gamtang gita, noktang gita, MDC-rang, Contractor-rang aro officer-rang an•tangtangnasa jakkalenga ine nikna gita man•enga. Changni chang chanchie nio duk ong•atani kattarangara, maio pangchake aro maini a•sel dormahana chammangipa tangkarangko on•gija watat piltaia ? Ma an•tangtang cha•rikna man•jawa inema? Cholitektekgijagipa rangsa aro oktangna chanchiaigipasa ine da•alo nikna man•enga” ine NGEA-ni Secretary Brithen M Sangma dormaha man•kujani bidingo aganangaha.

GHADC-o kam ka•gipa jinmani palo aganchakengon,  ofiice-o kam ka•giparangni chu•gimik dormahako on•china mol•molenga, ong•jaode mikkangchi an•tangtangni man•a nangnina kengija rakge ja•ku de•na nangaonan soktelgen aro darangkoba mikkang niani dongjawa ine NGEA-ni Secretary parakataha.