A•dokni ge•gittam ADC-rang UCC-ko jegalsona tom•e chanchirima 

0

Shillong, April 25, 2023: India a•songni bang·a dingtang dingtang jatrang chasongni chasongna ja•rikbaenggipa an•tangtangni niamrangko bon·atna aro songdonggipa pilaknan apsan niamko on·na miksonge, ma·mong sorkarini India a•songo ra·gatna sienggipa, Uniform Civil Code (UCC)-ko apsan ku•monge jegalsona, a•dokni ge·gittam Autonomous District Council (ADC)-rang Sombar salo tom•e chanchirimenba, Resolution-ko ra·gatna tik ka·angaha.

A•dokni ge·gittam ADC-rang jekai Khasi Hills Autonomous District Council (KHADC), Jaintia Hills Autonomous District Council (JHADC) aro Garo Hills Autonomous District Council (GHADC)-ni Chief Executive Member (CEM)-rang, Sombar salo Shillong songjinmao apsan tom·e chanchirimaniko dakangaha.

Ma•mong sorkarini Sixth Schedule a·jarango UCC-ko ra·gatna sienganiko jegalsona ge•gittam ADC-rang apsan tik ka·aha. Indake iani bidingo an•tangtangni Council-o tom·e ta•raken Resolution-ko ra·gatgen ine KHADC-ni CEM Titosstarwell Chyne, kobor ra·timgiparangna aganaha.

India a·song gimikon UCC bill-ko ra·gatna miksongengani gimin ADC-ni dilgiparang tom·anio ning·tue chanchirimaniko dakangaha. UCC Bill-ko ra•gatanichi ADC-rangni sasonko bilgriatgen aro jatni daka-rikanirangko chasongni chasongna ja·rikbaenggipa dakbewalrangko gimaatgen ineba ua agandapangaha.

Ia mamlani bidingo ge•gittam ADC-ni dilgiparang mikkang jarangon, Special Session-ko ong·atna miksongsoenga aro iako ta·raken chanchina gita nangenga ineba Chyne, kobor ra·timgiparangni sing·anina aganchakaha.

UCC Bill jatni daka-rikanirang jekai, bia ka·anirango aro uandake bang·a dingtang dingtang kamrango neng·nikanirangko ra·bachongmotgen. Jensalo UCC-ko ra·gatahaon, bia ka·ani bewalrang apsan ong·na nanggnok aro an•chingni dakbewalrangara namen dingtangani gimin torom aro jatni daka-rikanirangba dingtanggrikgen. Unbaksana, Scheduled Tribe (ST) a·ja ong·ani gimin a·doko UCC-ko ra·gatna man·chongmotjawa ine KHADC-ni CEM parakataha.

Batanggipa somoio, Citizenship Amendment Act-ko Sixth Scheduled a·jarango watchanganga gitan, a•doko UCC-ko watchangna nanga aro a·dokni ge·gittam ADC-rango jinma chanchirime tik ka·aniko ra·chaka gitan a·dok sorkariba apsan namnikpana nanggen ine Chyne agandapataha.

Leave A Reply

Your email address will not be published.