Tura, April 4, 2022: Tura-ni dingtang dingtang gittimrango donggipa chadamberang BJP dolo napeaha ine Tura-ni BJP MDC Bernard N.Marak parakataha.
Bang•a chadamberang uamangni BJP dolo bakrime kam ka•na nangnikaniko parakatenba songsalna namroro silroroaniko aro dingtanganiko ra•bana gita BJP dolan India a•songo dal•batgipa politikal dol ong•engani gimin mikkangchi jatna aro a•songna nambate aro rakbate kamrangko ka•angna miksonge BJP dolo napangtokaha.
Unbaksana chadamberang songsalo janggi tangani inditan corruption ba akal karap ong•roroanganiko nike, Garo Hills-o Corruption-ko bon•atna BJP-na agre gipin dolrang gisiko nangjani gimin BJP-na chakpae kamrangko ka•angna miksonge BJP dolo napaha ineba parakataha.
Indake ong•engon, chadamberang ia Garo Hills-ni dal•begipa corruption-ko ba tangka cha•boke kam ka•anirangko ma•mongni BJP dilgiparangsa bon•atna gita man•gen ine uamang ka•donganiko parakangjolaha.
Chadamberangni nikanio, bang•a ma•gipa pagiparangan salantio hajira kam ka•e janggi tanggiparang ong•a, mittamrang sorkario hajira ka•giparang, skigiparang, GHADC-o kam ka•giparang, muster roll ka•giparang aro dingtang dingtang rakbegipa kamrangko ka•e janggi tangna nangani a•sel bang•bata chadamberangan skulna tangka gamna man•jae poraianiko dontongna nangao ga•aka.
Uni gimin indake namgijagipa janggi tangani bewalko dingtangatna aro songsalo namgipa janggi tanganiko ra•bana chadamberang kamko ka•na nangnike BJP dolo bakrimeaha ineba Bernard Marak parakataha.