Shillong, April 27, 2023: Meghalaya a•dok nina nitogipa, rona an•senggipa, niksokgijagipa a•brirang, tangsekgimgim joksolangenggipa chibimarang, boksogimgim ontimenggipa chidarerang, tangsekgipa buring bolgrimrang, gitchak rimit tangsek nitoriri balenggipa rokkomari pulrang, bang•a dingtang dingtang matburingrang aro dingtangmanchagipa jatni dakbewalrangko a•gilsak gimikni manderangni nina namnikgipa, “Abode of the Clouds” ba “Aramrangni Dongram” ine mingsinggipa biap ong•a.
Re•anggipa bilsi dipet, Meghalaya Tourism Department, Umiam Sailing Club baksa an•saobegipa, Northeast Regatta-ko a•bachengataha aro indake ia an•sengbegipa concert-ko April 29-oni May 2 tarikona, Umiam Watersports Complex-o ong•atna tarisoenga ine parakataha.
Ia biap Shillong songjinmaoni km 20 mang chel•ao donggipa, Umiam-ara 1000 miter-rangni ka•mao sagaloni feet 3,200-mangni kosako donggipa, 220 sq km mang ong•gipa, mandeni tarigimin chikong ong•a.
Ia Northeast Regatta-ko a•dokni Tourism Minister Paul Lyngdoh, oprake on•ani ja•mano, a•dokni Skotong Minister Conrad K. Sangma, April 30 tariko re•bae kal•susagiparangna uni nama sikaniko on•angskagen.
Indake ia kal•susaanio India-ni dingtang dingtang dam-10 a•dokrango donggipa club ge 12-oni sak 80 manderang sal 5-na ong•atenggipa susaanio bakko ra•anggen. Unbaksana Indian Army aro Naval Service-rang ba UDAY FOUNDATION TEAM, India-ni ge•samangmang ring chogipa NGO bakko ra•anggen.
Ia ring ba boat Regatta-ko ong•atani miksongara a•doko Water Sports ba chio kal•susaanirangko nambatatna, tourism-ko bariatna aro ring choani biap ine World Sailing Map-o nakatatna, medal man•giparangko nakatatna aro workshop-rango bak ra•atna didie chadamberangna janggi tangani cholrangko bikote uamangko bil gnangatani ong•a.
Ia manianio ringo chosusaan baksa doka dam•ani aro jatni dakbewalrangko dakmesokani, ong•telaigipa aro nitogipa biaprangona re•rame niani, cha•ani ringani aro gipin bosturangko palani, ring chogiparang aro rona re•bagiparangna tour package-rang, paintball, camping sports aro Umiam-ona river cruise boatrangko ra•baanian ong•a.
Ia susaniona a•songoni je club-rang aro manderang re•bana gita man•gen aro ianona ge 12 club-rangoni sak 80-oni 100-ona ring chogiparang baksa Army aro Navy dolrang aro Class 6 Association-rang bakko ra•anggen ine ka•dongsoenga. Re•baenggipa April 29 aro 30 tarikrango biaptangni aro a•paloni mingsinggipa git ring•na changgipa, dokgipa dam•gipa dolrangni concert-ko nikna gitaba man•gen. Dolprakan an•tangtangni dingtangmancha changa-sapaniko mesokanggen aro doka dam•anirangko namnikgiparangna namen an•saobeani ong•gen.
Concert-ni skanggipa salo K-Pop Artiste Kim Woojin git ring•anggen aro gnigipa salo Delhi-ni dokgipa dam•gipa dol Twin Strings-ko a•bachengatskagen. Unbaksana gipin ga•sugipa git ring•gipa dolrangba dongpagen, jekai Lynx, Ricaa Stella, Banrap, Rum & Monkeys, LB3, Young Natee, Larger Than 90 aro DJ Favian, aro una agre gipinrang.
Ia an•saobegipa concert-rang manderangna dingtangmancha gisiko an•saobeaniko on•anggen. Indiba ia concert-rangko nina manderang tangka gri indin napna man•gen ineba u•iataha. Ia manianio ticketna biming segataniko, April 24, attam 5 bajioni a•bachengataha. Uni gimin uarangko da•o ra•ena gita man•gnok. Ia manianira an•tangni ripengrang aro nokdangni manderang baksa somoi ra•e neng•takna aro an•tangni gisikko an•saoatna tarigimin ong•a.
Meghalaya, India a•song gimiko nitobatgipa biaprangoni damsa ong•a, ine bang•a manderang ma•sia aro bebe ra•a, ia a•doko tourism-na bang•a dingtang dingtang nikani nianirang gnang. Uni a•sel, a•dokona dingtang dingtang a•songni manderang a•dok nina gita bang•en re•batokenga, indaken 2019 bilsio sak lak 12.7 manderang a•dok nina re•baaha aro 2024 bilsio sak lak 15-mang ong•na niksamsoenga ine tourism department parakataha.