Tura, April 26 2023: Association for Democracy and Empowerment (ADE), Apex Committee-ni President Dalseng Bira Ch. Momin, Meghalaya a•dokni Power Minister-na lekka sedoate, Garo Hills-o ru•uta kontarangna bijoli kimitengani bidingo manderangni neng•nikanirangko janapataha.
“April 19 tarikoni Garo Hills-o konta 10-na bijoli kimitengaha. Batanggimin salrango konta 7-na bijoliko kimitmitting somoio bang•a manderang neng•nikanirangko chagrongaha. Garo Hills-o donggipa adita Cottage Industry-rang indita kontarangna bijoliko kimitani a•sel namen neng•nikaniko man•tokaha. Uasan ong•aigija, Hospital-rango sagiparangko sangipa dokdor-rang aro kam ka•giparang neng•nikaniko man•enga. Commercial Sector-ko niatgenchimode, uamangba bijoli kimitani a•sel neng•nikaniko man•a. Salantio kam ka•na nanganirangko dontongna ga•akenga. Poraienggipa chatro chatrirang, skulo skigiparang pilakan bijoli dongjani a•sel neng•nikaniko chagrongtokenga” ine Dalseng Bira Momin janapataha.
“Chinga sorkariko rikenggipa dilgiparangni kamrang altugipa ong•ja ine ma•sia, indiba uamang gnigipa changna sorkariko rikengaha aro ian skanggipa changna Garo Hills-o kanta 10-na bijoliko kimitani ong•enga. Uamang a•dokko nambate taridapna aro indakgipa neng•nikanirangko sokatjana krenge kamrangko ka•na nangahachim. Chinga obostarangko niate, Load Shedding-ko ta•raken dontongatchina mol•molna sika” ineba ADE, Power Minister-na seachi u•iataha.