GSMC a•doko Roster System-ni bidingo so•sojengjeng ong•anina tom•e chanchirima
Tura, Arpil 26, 2023: Garoland State Movement Committee (GSMC), Monggolbar salo tom•aniko ong•ate, Meghalaya a•doko mongsonggipa jatgittam Garo, Khasi aro Jaintia jatrangni gisepo Roster System aro Winter Capital-ko dabiani bidingo so•sojengjeng ong•katengani gimin suk ong•gijaniko parakataha.
GSMC pangnan Matgrik Sonaram R.Sangma sagini A•chik jatna dakgrikdilangako gisik ra•e, uni kamko ja•rike Garoland-ko dabienga.
Unbaksana, Meghalaya a•dokni skanggipa Skotong Minister, Captain Williamson A.Sangma sagi niksamsoa gnang Meghalaya a•doko songdongenggipa jatgittam mongsonggipa jatrang Garo, Khasi aro Jaintia-rang darangba komigija apsangrik sorkarini kamrangko man•pachina miksonganio, Job Reservation Policy-ko tarie donangaha. Indiba da•alo Job Reservation Policy-ko Meghalaya a•dokko man•chengaoni bilsi 50 batangpiloba, A•chikrangna chamgimin bak rengsiko chu•gimik man•paja, iara maini a•sel indake ong•enga ine GSMC sing•doangaha.
Bang•a A•chik chadamberang skia man•giparang dongaha, uamang kam gri dongenga, ma•gipa pagiparang dedrangko sorkarini kamko man•pachina, tangka paisa bon•ne poraiatani maming namgni dongjajok ine GSMC-CEC, HQ Tura-ni Spokesperson Ryan Ch.Marak suk ong•gijaniko parakataha.
Indakgipa obostarang Meghalaya a•doko songdongenggipa jatgittam mongsonggipa jatrangni gisepo meligrikna man•jaengani a•sel, ding•chaogrikani ong•enga. Uni giminsa Garo-rangna dingtang a•dokko ba Seperate Garoland State-ko GNC aro GSMC dabienga. Apsandake, Khasi Hills-oba HSPDP aro HITO, Khasi aro Jaintia-rangna dingtang a•dokko ba Separate State-ko dabienga ine parakataha.
Garo-rang ru•uta bilsirangonin Winter Capital-ko songe on•china dabienga, indiba Tura-o Winter Capital-ko songe on•kuja aro High Court-ni rai on•gimin, Roster System-ko a•doko ra•gatchina Garo Hills-ni NGO-rang sorkariko didiskaenga ineba Ryan Marak janapataha.
Uni gimin, “Chingni ka•sara Khasi aro Jaintia ripengrang, an•ching darangkoba mikbugrikjana gita an•tangtangna dingtang a•dokko ba Separate State-ko apsan ku•monge dabiangna. An•ching jensalo Separate State-ko ba dingtang a•dokko man•ahaode, darangkoba mikbugija ritchasa percent kamrangko man•gen, unode an•ching an•tangtangchin sason-ni bilko ra•gen aro chu•gimik pilak namgnirangko man•gen” ine Ryan Marak, Khasi aro Jaintia jong-adarangko mol•molataha.
Garo-rang Garoland-ko man•ahaode, bang•a chadamberang kamrangko man•gnok aro dingtang dingtang namgipa janggi tangani cholrangkoba a•doktangon man•gnok ine Ryan Marak parakataha.