AYWO Kanai chibimako nosto ka•enggipa company-ni kosako jegale lekka sedoa 

Baghmara, April 27, 2023:A•chik Youth Welfare Organisation (AYWO) Baghmara Branch, NHIDCL Company-ni kosako jegale, South Garo Hills a•jani Deputy Commissioner-na lekka sedoangaha.

AYWO-ni jegale DC-na lekka sedoani miksongara, Baghmara-oni Ranikor-ona State Highway sorokko tarienggipa NHIDCL,company Kanai chibimao a•arangko galdapani a•sel Mahadeo-ona jokangenggipa chimako dim•pengenga aro Kanai chibimao donggipa Fish Sanctuary-ko nosto ka•enga ine parakataha.

AYWO Baghmara Branch-ni President Benitto M.Sangma-ni janapatani gitade, Baghmara-oni Ranikor-ona tariangenggipa State Highway sorokko taria namgenchimoba, environment-na namjabatskaenga, uni gimin namgipa environment-ko ripingna nanga.

Mongsongbate ia a•selara, sorok tarenggipa company Kanai chibimao a•arangko galani a•sel chibimako dim•penga gita dakenga aro Kanai Fish Sanctuary namen nosto ong•enga. Uni gimin chasongni chasongna tangkame joksalenggipa chibimako maming dakeba dim•pengna aro nosto ka•na nangja. Skangoni chibima jedake jokenga, apsandake maming champengani gri jokangna nanga ine Benitto Sangma janapataha.

Minggipin a•selara, ia project-ni nanganina kam ka•enggipa ba sorok tarienggipa company Mahadeo chibimaoniko an•cheng bikote jakkalenga.

Uni gimin niam gri A•chik a•songni ong•telaigipa mal gamrangko skatang jakkalenggipa aro nosto ka•enggipa company-ni kosako niam gita raka sinjetaniko on•ne mikkrakatchina AYWO a•jani DC-ko didiangaha.