Resubelpara, April 4, 2022: Meghalaya a•dokni sorkari North Garo Hills a•jani Dainadubi songo donggipa Food Processing Centre-ko West Garo Hills a•ja ona ra•jitbana chanchienga. Sorkarini chanchianiko NGH a•jani bang•a NGO dolrang, GSU, GSMC, AHAM, People’s Joint Action Committee (PJAC), AAYF aro FAF dolrang jegalenga ine koborna u•iataha.
Uamang jinma melie Food Processing Centre-ko bi•aptangon donaichina molmolenba memorandum ko see Agriculture Minister Banteidor Lyngdoh na on•angaha.
” Dainadubi o donggipa Food Processing Centre-ko Upgrade ka•ako man•gipa ong•a aro songni manderang iano kamko ka•enba detangko aldu mittangenga, indake ia Food Processing Centre-ko gipin chi ra•anggenchimode songna aro a•jana bang•a neng•nikani onggen. Gisik ra•atpiltaia gita Food Processing Centre-ko Dainadubi o songna am•ani gimin bang•a manderang namnikja•e jegalaniko daktokachim, 2011-12 bilsini gisepgriko sorkarini ra•chakaniko man•e Food Processing Centre-ko Dainadubi songo kror 2 tangkarangko jakkalenba matchote rike oprake on•angaha” ine NGO dolrang aganaha.