Tura, April 24, 2023: Meghalaya Janata Dal United (JDU), State Convenor aro State General Secretary-ni tol•e matnanganiara kakket ong•ja. JDU dilgiparang re•anggipa Assembly eleksin-o party-tangna kam ka•gija, gipin party-nasa kam ka•aha aro an•tangko tangkana pale cha•aha ine songbad-o seatgipa kattarang kakket ong•ja ine JDU-ni gitcham Secretary Cyril D.Marak aganchakatskaha.
Cyril D.Marak-ni parakatani gitade, “Uamang angko JDU party-oniko ra•galani ba terminate ka•ani maming notice-kon angna on•atja, Robinush aro Joshua an•tangtangni kamrang namjani a•selsa, Party High Command, Meghalaya eleksin-na badita tangkarangko watataha, uko parakgija jrip donani gimin, anga sing•sandianiko dakani gimin kratcha•esa, Robinus T Sangma aro Joshua Marak sruksruk angna mamingkoba u•iatgija, tol•e songbad-o seataha. Anga re•anggipa Assembly eleksino JDU party-na a•bachengoni bon•kamaona, North Tura elakkao party-ni tangka gri an•tangni koroschi kamrangko ka•aha. Uni gisepon, uamang angko matnange songnad-o tol•e seataha” ine Cyril D.Marak parakataha.
“Indiba anga uamangni tol•e matnanganina gisik saja aro bobil daknaba sikja. Uamangni alaksi dake gisik cha•chippilgipa kamrangko namnikjae aro angni kosako tol•e matnangani giminsa, anga Party High Command-na kam watani chittiko ba resignation letter-ko on•ataha” ineba u•iataha.
Meghalaya JDU Robinus T Sangma aro Joshua Ch.Marak-ni party-o dongenga dipet, gisiko cha•chippile kam ka•gipa party-o bak ra•jawa. A•bachengonin, “Anga JDU party-o napna miksongani dongjachim, indiba Joshua Marak-ni angko drae, State Secretary Post-o donataha aro an•ching apsan kam ka•na ine ku•mongaha. Indiba ua da•o, Convernor baksa gisiko cha•chippilani dongesa, angko jegalatskaha. Uamang angni kosako je matnanganiko dakahachim, uarang kakket ong•srangja aro uamangni angko tol•e matnanganiara angni bimingko nosto ka•na aro kratcha•atna miksonganisan ong•aia” ine JDU-ni gitcham State Secretary Cyril D. Marak parakataha.