Tura, April 27, 2023:All Garo Hills Trained Electricians Association (AGHTEA) HQ, Tura-ni dilgiparang, batanggipa April 25 tariko a•dokni Power Minister AT Mondal-ko uni Ganol Hydro Power Project Dam-ko nina re•bae, Rongkhon MeECL-IB-o tom•aniko ong•atani salo gronge, minggittam miksonganiko segimin Memorandum-ko on•angaha.
AGHTEA-ni minggittam miksonganiranga, Tura-o Electrical Licence Supervisor Contractor-rangni licence-rangko renew ka•na man•na gita chu•gimik Tura-ni Electrical Inspector-na bilko on•na nanga. Tura-o electrical licence office-ko bak ka•e on•ani da•o bilsi 45 gapengaha, indiba electrical licence-ko renew ka•na Shillong-chi wataton, ja 5 ba ja 6 somoiko nanga. Uni gimin, electrician-rangni neng•nikaniko ta•rake nirokatpachina AGHTEA-ni President Justine T.Sangma Power Minister-ko mol•molataha.
Re•anggipa 2019 aro 2020 bilsio Soubagya Project-ko Onycon Infra LLP-ni ning•o sub-contract ra•e kam ka•ani tangkarangko da•onaba man•kujaengani gimin, sub-contractor-rangni man•na nangenggipa tangkarangko ta•rakale on•pachina, Soubagya Project-ko chalaienggipa nokgiparangko didiatchina, AGHTEA Power Minister-ko mol•molangaha.
Unbaksana da•ororo nangana bate Load Shedding ba bijoli kimitani a•sel bang•a manderang ia bilsio neng•nikanirangko chagrongbatenga. Mongsongbate hospital-rango sagiparangko sanenggipa dokdor-rang, salanti attampringna bijolini kamko hajira ka•enggipa electrician-rang, office-o kam ka•giparang, cyber-o kam ka•giparang, skul aro kolej-o poraienggipa chatro chatrirang, songbad segiparang aro dingtang dingtang gadango kam ka•giparang, batanggipa bilsirangona bate, namen neng•nikbataniko man•batenga. Una agreba walo cha•ugiparang bijoli dongjani somoio andalako chol ra•e, manderangoniko ra•seke ra•anirang batroroenga, uni gimin manderangni namgnina chanchie, bijoli kimitaniko ta•rake namatchina, AGHTEA power minister-ko didiataha.