Tura, April 22, 2023: Niksamso Garo Community Organisation (NGCO) HQ, Simsanggre Sukrobar salo ru•uta bilsirangoni je niamrangko GHADC-o ra•gatkujachim, ta•rake chu•sokatchina dabie, GHADC-ni CEM-na lekka sedoangaha.
Indiba dabianirangko chu•sokatja ong•ode, office kulina on•gija jingjengataniko dakanggen ine NGCO janapataha.
“Chinga jekon dabiengachim, uko ta•rake chu•sokatna nanga. Chingni dabianiara, Service Rules, Financial Rules aro Separate Electoral Roll-ko GHADC-o ta•rake ra•gatchina aro niam gita Council-ko chalaichina chingni miksonganian ong•a” ine NGCO parakataha.
Ia dabianirangko knachakgijaniara, GHADC-o maiba neng•nikani dongama ine NGCO-ni President Tengrak Marak sing•doangaha.
Ia niamrangko A•chik a•song aro jatni namgnina dabiengon, GHADC-o jattangna bilko on•na nanga. Uni gisepon knachakja ong•ode, ru•utgijan jingjengataniko dakanggen ineba parakataha.
District Council-o A•chik jatni Niam Reti-ko ra•gatjaode, namgni dongja. Uni gimin jatni namgnina chanchie, dabianiko chu•sokatna nanga ineba NGCO janapataha.