AGHTEA a•doko Roster System-ko ra•gatchina dabie Skotong Minister-na lekka seata
Tura, April 23, 2023: All Garo Hills Trained Electrician Association (AGHTEA) Headquarter Tura, Job Reservation Policy-ko nipiltaichina aro Roster System-ko ra•hatchina mol•mole, a•dokni Skotong Minister Conrad K. Sangma-na lekka sedoataha.
1972 bilsio Meghalaya a•dokko man•chengaoni, Captain Williamson A.Sangma a•dokni manderangna chanchie, sorkarini kamko apsangrik man•pachina, Job Reservation Policy-ko ra•gate donangaha.
Indiba Meghalaya a•dokko man•chengaoni da•alona bilsi 51 ong•piloba, A•chikrangna chamgimin bak rengsiko chu•gimik man•rongja. Uni giminsa darangkoba mikkang nitegija, kamko on•china High Court, Roster System-ko ra•gatchina raiko on•ataha.
“Chinga AGHTEA, HQ Tura, Khasi Hills-ni NGO-rang aro VPP MLA-rang Roster System-ko jegale, sorkarina sinjetaniko on•genchimoba, A•chik jatni namgnina Job Reservation Policy aro Roster System-na chakpaaniko on•enga aro Roster System-ko ra•gatna nangchongmota. Khasi MLA-rangni Roster System-ko jegale, jingjengataniko chinga ra•chakna man•jawa. Uamang Roster System-ko jechakgenchimoba, chinga A•chikrang Roster System-ko ra•gatchina dakgrikskagen aro ku•cholsan re•mikkanggen” ine AGHTEA-ni President Justin T.Sangma parakataha.
Uni gimin, AGHTEA dolba, a•doko Roster System-ko ra•gatchina Skotong Minister Conrad K.Sangma-ko mol•mole lekka seddoataha.