Shillong, April 22, 2023: Trinamool Congress (TMC)-ni dilgiparang, Bharatiya Janata Party (BJP) dolo napna ja•ku de•enga ine manderangni agananiko Dr Mukul Sangma aro Charles Pyngrope raken jegalataha.
Koborna parakani gitade, re•anggipa Assembly eleksin-o adita sak MLA amrikjani gimin TMC-ni gitcham MLA-rang, BJP dolo napna ja•ku de•enga ine jangbinganiko Dr Mukul Sangma chanchienga, indiba Assam a•dokni Skotong Minister Himanta Biswa Sarma jatchiona re•bachanga ine tol•e jangataha.
Mamata Banerjee-ni re•dilenggipa TMC dolko Eleksin Commission “National Party”-oni ra•galna am•aniko kobor man•e, Dr Mukul Sangma BJP dolo napangskana cholko ra•enga ine Songbad-rango jangataha.
Kobor ra•timgiparang baksa agangrikengon, Ernest Mawrie, “Anga TMC-ni ching baksa bakrime kam ka•na chanchiani bidingo maming koborko aro sea jotachi u•iatako da•odipet man•soa dongkuja. Chinga Songbad-rango aro Social Media-rango gatatanikosan niksona gita man•aia. Indiba BJP baksa bakrime kamrangko ka•na sikenggipa manderang donggenchimode, chinga darangkoba jegalsoja, kusi ong•en rimchaksona sika” ine aganaha.
BJP dolni saksa dilgipa, jean an•tangni bimingko parakatna on•jachim, ua songbad-ni manderang baksa agangrikengon, “Dr Mukul Sangma aro unbaksa sak 4 TMC MLA-rang, BJP-o napna ja•ku de•engahachim, indiba Assam-ni Skotong Minister jatchiona re•bachangaha” ine aganskaha.
Uni gisepon TMC-ni MLA Charles Pyngrope BJP dolo napna am•aniko jegalenba, “Chinga iani bidingo mamingkoba agangrika dongja. Chinga TMC dolko mikkangchi kimkim ong•ate, maikai kamrangko ka•anggen, iarangni bidingosa, dolni dilgiparang baksa agangrika” ine talatskaha.
Dr Mukul Sangma-ba BJP-o napna am•enga ingipa kattara kakket ong•ja, “An•chingni a•doko ong•enggipa obostarangko nirok sandiani pal batesa badiaba manderang gipin dolni bidingo tol•e aganskaenga ” ineba Pyngrope agandapataha.