29 March 2022, Maikhuli: Mijal mongolbar salo All India Trinamool Congress ni MLA Pa. Zenith M Sangma aro Winnerson D. Sangma Ri Bhoi a·jani song dam bri Pillangkata, Maikhuli, Barapathar aro Yangkhuli songrangona wenange Maikhuli songo Assam Government-ni a·ako ra·sekani bidingo aro Meghalaya Chief Minister-ni songni manderang baksa ku·mong melie golpogrikchenggija Assam a·dokna pakwatani bidingo duk o chakenggipa songni manderangko grongjolnagita re·angaha.
Government rikchengaoni da·onaba songni manderang dakchakaniko man·ja aro Assamni manderang sima ari ona re·bae neng·nikatgenchim ong·oba Meghalaya sorkari warachaknaba dakchakja. Meghalaya Chief Ministerni Assam Government baksa golpogrikanio Maikhuli songni manderangni skanio pangchakesa a·ako obostani kri onna nangode on·gen ine Assembly Session o aganaha. Assam sima nikwatao songdongkamgipa manderangsa indita baljrime gitchianikode chakna nangengjok.
Da·ona kingkingba government oni ba cabinet minister rangoni darangba nengnikaniko niroknagita re·baa dongkuja. Meghalaya a·dokko manna skang ba Asssam a·dokni ning·o dongmiting somoionin ia bi·apko Scheduled area ine chanaha je dakode jatni niam reti aro daka rikako a·paloni manderang ramram sinjetna man·jana gita Schedule area ine Indiani constitution-o pangchake tarie donangaha. Unbaksanaba a·a, chi, balwa aro song nokko bichal ka·na gita chu·gimik bilko darang gipinni jako sason ka·china gita on·jaha indiba A·king Nokma, Nokma, Sordar aro Headmen ba Syiemni jakosa song nok aro a·jatangko Scheduled Areani niam aro Indiani Constitution-o pangchakesa A·chik jatna donangaha ine AITC-ni MLA Pa. Zenith M Sangma ui·ataha.