Williamnagar, March 30, 2021: Garo Hills Autonomous District Council (GHADC) ni Chief Executive Member Albiniush R Marak aro Deputy Chief Executive Member Nikman Marak, Budget session-ni gnigipa salo Rongrong elekka-ni MDC Rinaldo Koksi Sangma-ni ragatanggipa motion, Seperate Elektoral Roll-ko ra•chakgijaniko Niksamso A•chik Society (NAS) raken jegala.
“Seperate Elektoral Roll-ko man•a gita A•chik a•songni pilak MDC rangan ku•cholsan ong•e krenge kamko nanga ong•jagenchimode re•baenggipa sal somoirango GHADC na dal•bea gimaani onggen. Seperate Elektoral Roll-ian A•chik jatko pilak onggija kamrangoni chel•chaksonagipa dal•begipa pakma gita ong•a. Sixth Schedule-ni gnigipa paragraph o Elektoral Roll-ko ra•gatgenchimode sawa pu•onna man•gen aro sawa GHADC ni elektion-o susana man•gen uko rongtale sea gnang. GHADC ian ‘G’ oikorchi a•bachenga, aro ‘G’ ian Garo rangko miksonga, Garo Hills Autonomous District Council ine aganon iano A•chik jat rangsan bakko ra•na gita manaigen. Chinga an•tangni GHADC nokko gipin rori jat baksa sualgrikna man•jawa. GHADC ni a•bachenga somoi-onin A•chik jatni bang•a NGO dolrang Seperate Elektoral Roll na dabienga. Indiba an•ching A•chik jatni mitam dilgiparang an•tangtangni man•gniko nikenba A•chik jatni nokko gipin baksa sualgrikenga. Indakgipa namgijagipa dilgiparangko A•chik nok (GHADC) oni a•rikgalna nanga” ine NAS dolni President Tengrak Marak aganaha.
Ia bilsini gisepgrikon A•chik jatko chel•chakani pakma Seperate Elektoral Roll ko ra•gate on•chongmotna nanga. An•ching A•chik jat rangoni saksa seng•begipa aro jat tangna ka•sagipa Seperate Elektoral Roll-ko A•chik jatna nangchongmota ine ma•sie Budget session o chadenge dabiangpaachim indiba NPP dolni dilachi rikenggipa Executive Committee ni membor-rang ra•chakjaha ine koborko man•soe chinga namen duk ong•a ineba ua agandapaha.