Tura, March 28, 2022: West Garo Hills a•jani Deputy Commissioner (Supply), a•doko National Portability for Ration Card-ko maming neng•nika gri chalaiangna aro National Food Security Act (NFSA)-ni gita AAY aro PHH card aro Aadhar Card gnanggipa manderangna One Nation One Ration Card (ONORC)-ko sorkari kangal cholgri manderangni namgnina ra•gataha.
Uni gimin je manderangan je a•jani ba a•dokni, Fair Price dokkanoniko sorkarini sualenggipa mirong aro gipin cha•ani bosturangko skangona bate bang•bate man•na gita an•tangtangko “Mera Ration”-o register ka•na nanggen ine u•iataha.
“Mera Ration” App-ko pilakan Google Play Store-oniko an•tangtangni smartphone-o download ka•e uno chu•gimik nanganirangko gapate online gita submit ka•na man•gen, unbaksana ONORC-ni form-ko download ka•e uano gapatenba an•tangtangni Bank Account, Ration Card, EPIC Card, Aadhar Card aro uandakgipa document-rangko Deputy Commissioner (Supply) Office-ona ra•ange on•ena gitaba man•gen ine u•iataha.
Aadhar card gnanggipa manderang jemangan ONORC-ni gita sorkarini sualenggipa mirong ba gipin bosturangko ra•e cha•engachim, an•tangtangni Ration Card-rangko on•chapna nanggen, unbaksana Ration Card-o membor saksana bate donggenchimode, 50%-ni gita sorkarini sualenggipa bosturangko changsanno man•anggen, indiba ration card-ko mesoke bostu breani sal 10-ko watchangesa man•anggen ineba u•iataha.