Ampati PS-ni gitcham officer in-charge-ko janggi tanga gimikna pattoko donata

Shillong, March 28, 2022:Re•anggipa 2013 bilsio South West Garo Hills a•jani skotong Ampati Pulis Station-ni Officer-in-charge Nurul Islam bilsi sokkugijagipa me•chik bi•sa abisako til•ekdraani obostako Special POCSO Court Sukrobar salo parakataha. POCSO Court-ni Special Public Prosecutor Evalarisha Rynjah Sombar salo dosko nigrikaniko dakenba Special POCSO Court-ni rai-o pangchake dos dakgipa pulis officer-ko janggi tanga gimikna pattoko donatchina ge•etaniko on•angaha.

Re•anggipa Bristibar salo Nurul Islam-ni dosko nike 2012 POCSO Act aro IPC Act-o pangchake niam gita sastiko on•angna tik ka•aha. Pattoko donata baksana ”Tangka gong lak 1-ko jorimana dai gamna nanggen aro janggi tanga gimikna ia pulis officer-ko sasti on•na nanga” ine Rynjah aganaha.

Ampati PS-ni gitcham officer in-charge re•anggipa 2013 bilsini March 13 tariko bilsi 14 san ong•kuaenggipa me•chik bi•sako Ampati PS nokdringo rimnape til•ekdraaha aro apsan bilsini March 31 tarikoba bilsi 17 san ong•kuenggipa me•chik bi•sani abitangko drae kal•akahachim.

Nurul Islam ia obostako darangnaba aganne on•jachina ka•mikkenataha aro manigija manderangna aganode so•ote galgen ine ka•mikkenataha ine duko ga•akenggipa pagipani badi ka•anio janapatahachim.