Tura, March 28, 2022: Bluwin Chisik Sangma-ni segipa ki·tap “Poraina Skiani A” jekon Tura D.J. Publications chappa ka·aha, ua ki•tapko Garo Hills-ni pilak skulrango ra·anichi neng·nikanirangko man·enga ine Tura-ni Mothers’ Union (MU) aro A·chik Literature Society (ALS) jegalataha.
Ia ki•tapni bidingo MU aro ALS dolgni nangrime March 24 tariko chanchirimaniko dakenba A·chik ku·sikko gam·atani aro katta jakkalanio meli-ma·gapjani gimin, ia ki·tapko skulrango class KG-ni bi·sarangna skianiko ka·mao mesokatenggipa kattarango pangchake jegalataha.
Ia ki·tapni jak 16-o on·gipa kattarang, jekai KAB, KACH, KAJ, LACH iandakgipa kattarang A·chik-ku•o gam·anirang dongja. A·chik kattarang j, ch aro uandakgipa gipinrango bon·a dongja. Apsandake ki·tapni jak 15-o “Oikor minggittamchi gam·atani (Menggo)” ine katta bichongko donne, menggoni noksako dongipao seani namen dingtanga, uano oikor ming dok (6) m,e,n,g,g,o, ong·skaa. Iano on·gipa oikorrang, gam·atanirang menggo baksa nangrimani dongja. Kattarang ba oikor rangko nangdime seanirang, jedake HAN, HAP, CHAJ, BAD, CHACH aro uandake gipinrang, menggo baksa nangrimani dongja. Apsandaken, jak 13-oba “Oikor minggnichi gam·atani (Do·sik)” ine katta bichongko donne do·sikni noksako dongipao seani dingtanga, uano oikor ming dok (6) d,o,s,i,k, ong·skaa.
Rak•ako tik ong·gipa biapo donne seja, jedake “e.ching” (jak 5 aro jak 7), “te.gatchu” (jak 11), aro “wa.a” (jak 12). A•chik Ku·sikko poraianio chatro-chatrirangna skichenganio ba chu·bata gadango skion, je ku·sikko skienga ua ku·sikko jakkalna nanga. Kosako mesokgimin gita, “Poraina Skiani A” ki·tapo seanirang A·chik ku·sik aro kattarango nangrimani dongja. A·chik kattako gam·atanio, gipin ku·siko gam·atanirangko nangchapate poraiatna nangja. Kosako mesokgipa a·selrangni gimin “Poraina Skiani A” ingipa ki·tapko poraiani ki·tap dake jakkalaniko MU aro ALS raken jegalataha. Ia ki·tapko jakkalanichi A·chik jatna bang·a namgijanirangko ra·bagen ineba janapataha.