Shillong, March 15, 2022: Budget Session-o Improvised Explosive Device (IED) boma changni chang a•doko bretani bidingo aganchanchirimaniko dakengon, Gambegre elekkani MLA Saleng A. Sangma an•tangni dolni ka•rimska saksako gisik ra•e jinmana aganprakengon, Jonathone Sangma jean 2018-ni eleksin-o su•sana wenmiting somoio apsandakgipa bomako galdapani a•sel janggitangko gimaataha. Jonathone Sangma aro unbaksa gipin sak 3 manderang ua obostao janggitangko gimaataha.
Ia misilbegipa obostani bidingo darangba an•tangni dosko ku•rachakjaha, indiba bang•bata manderangan Garo National Liberation Army (GNLA) bobil dolko potchiptokaha ine ua aganaha.
“Da•alo anga angni dolni ka•rimska Jonathone sagini siani obostako pilakan ma•sina nanga ine National Investigation Agency (NIA)-ko ra•bae kamko ka•atchina dabia” Saleng A.Sangma budget session-o aganaha. Re•anggipa 2018 bilsini Assembly eleksino Jonathone Sangma, Nationalist Congress Party (NCP) dolni tiketko man•ne, Williamnagar elekkao MLA-na susaengachim. Ua 2013 bilsio independent candidate ong•e chakatmiting somoio chegipa ong•na man•jaha. Eleksin-na campaign ka•e Williamnagar-ona re•bapilmiting walni somoio rang•gitik rasong gribee ua IED boma godapako man•ne janggitangko gimaataha.
Ia obosta ong•na bang•gija salrang skang mangmang Williamnagar a•jani badiaba gittimrango Jonathone Sangma-na pu•ongenchimode, goe galgen ine ka•mikkenatgipa kattarangko lekkao see tape ramarango donako nikaha. Indake 2013 bilsio Jonathone Sangma, Ma Deborah C Marak GNLA-ni dakchakaniko ra•e manderangko an•tangna vote on•china ka•mikkenatenga ine matnange badi ka•aha ineba ua agandapangaha.
Saleng Sangma-ni NIA-ko ia obostani bidingo sing•sandichina ra•bana nanga ine dabianiko Williamnagar elekkani MLA Marcuise Marak-ba ra•chake NIA-ko ra•bachongmotna nanga ine aganpaaha. Ia obostani bidingo Home Minister Lakhmen Rymbui, pulisrang ia obostani bidingo sing•sandianiko dakenga ine aganaha aro Judicial Commission-ba ia obostako nirokenga ine aganenba chu•gimik obostako agana jechakaha.