Buringni mongmarang mande saksako saknaata, bagan barirangko nosto ka•a

Nongstoin, March 16, 2022: South West Khasi Hills a•jani Ranikor Civil Sub Division-ni ning•o donggipa Kalapahar songona buringni mongma dolsa re•bae bagani barini gue, kesunat, te•rik aro bang•a a•bani bosturangko nosto ka•ani gimin songni manderang mongmako rikgalatmitting somoio saksa bilsi 32 ong•gipa Choki D.Shira-ko mongma saknaate donangaha ine kobor man•aha.

Ia a•sel ong•ani bidingo All Khasi Hills A•chik Federation (AKHAF)-ni General Secretary Manuel Ch.Marak-ni u•iata gitade, Monggolbar walni 10 bajimango buringni mongma dolsa songona re•bae bagan barini gue, kesunat, te•rik aro bang•a a•bani bosturangko nosto ka•angaha.
Choki Shira mongma dokglokako man•ne skoo namen saknaako man•ahani gimin, bakan uko Ranikor PHC-ona ra•ange sanna bananiko dakenga ine u•iataha.

Indake ong•engon je manderangni bagan barirangan nosto ka•ako man•giparang aro saknaa man•ne duko ga•akenggipa mandena Wildlife Department bostu nosto ong•ani kri tangka gampilskachina AKHAF mol•molangaha.
Kalapahar songni manderang an•tangtangni bagan barirangosa pangchake janggi tangengachim, indiba buringni mongmarang re•bae nosto ka•anichi bang•a bagan barirang aro a•bani bosturang nosto ong•ako man•aha ine Manuel Marak u•iataha.