Tura, April 4, 2022: Garo Students Union (GSU) Western Zone North Dadenggre dolni General Secretary Windombirth R Marak, GSU Western Zone West Raksamgre dolni karimskarangni tol•e matnangani bidingo agantalate on•angaha.
“Anga GSU Western Zone North Dadenggre ni karimskarang aro President ni jakchi GSU Phulbari Regional Unit-ni General Secretary songako man•e bilsi 10 na bate kamko ka•e dangdike on•angaha. Indake ru•uta bilsirangna Phulbari Regional Unit-o GS ni kamko ka•ani jamano angko Western Zone North Dadenggre ni GS songangskaaha aro anga da•al salona kingkingba GS ong•e kamko ka•enga. Dadenggre Western Zone North ko maming saloba dol gni dake ma•eka dongja. Unbaksana Dadenggre WZ North ni Units rang aro Sub-Units da•al salona kingkingba Dadenggre baksaan chaprime dongenga. Indide maikai aro maio pangchake GSU Western Zone West Raksamgre ni karimskarang ara GSU Western Zone North Dadenggre ni Phulbari Regional Unit-o ia jani 22 tarik o ong•atenggipa elektion ko champengna am•enga? Raksamgre an•tangni dingtang Sub-Division donga. Uandake Western Zone West aro Western Zone North baksa maming nangdimgrikani dongja. Raksamgre Western Zone West ni karimskarang gipinni kamrango napdragija an•tangna aro a•dokna jatna rake kamrangko ka•angode namangen aro mikkangchi indake gipinko tol•e botnam ong•atpajaode nambegen” ine General Secretary Windombirth R Marak aganaha.