Wiiliamnagar, March 28, 2022: Ja•manchake kobor man•ani gitade, East Garo Hills a•jao donggipa Rongmil pulisrang, Rongjeng Pulis Station-o segatgimin case no.11 (3) 2022 u/s 395 IPC-o pangchake ra•seke ra•gipa sak 4 manderangko Mejolgre Chekjongbra songoniko Sonibar pringo rim•aha ine koborko man•aha. Koborni gitade, re•anggipa March 24 tarik Bristibar salo Danal UP Skulni Principal ua ra•seke ra•gipa manderangni kosako badi ka•ahachim. Ua manderangni kosako skul Principal-ni badi ka•ani gitade, ra•seke ra•gipa sak 6 manderang A•brong songona sokahaon ramao dongsoe, Wageasi Out Post sepang North Garo Hills a•jani sima arigriko uamangni mobile phone-rangko ra•sekdrae ra•angahachim.
Ua ra•sekdrae ra•anio jak donggipa sakbri manderangni bimingrangko sing•sandie, badi ka•anio pangchake Rongmilni pulisrang Sonibar pringo Mejolgre songona re•ange chadrapaniko dakenba dos dakanio jak donggipa sakbri manderangko chanchichipanio rim•eaha aro uamangni mobile phone-rangko ra•sekaha ine kobor ra•timgiparangna parakaha.
Rim•a man•gipa sakbri manderanga Tillingbirth M. Sangma, Walak M. Sangma, Tengsan R.Sangma aro Chingrak M. Sangma ong•a ine ma•sina man•aha aro uamang gimikan Mejolgre Chekjongbra songoni ong•achim. Uamangko Rongmil OGC-ona ra•ange sing•sandianiko dakenga aro uamangko dosni kri niam gita sastiko on•gen ineba parakataha.