A•dok sorkarini SSA skigiparangni dormaharangko bon•e on•kujaengani gimin skigiparang suk ong•gijaniko parakata

Tura, January 15, 2022: All Garo Hills SSA Teachers Association (AGHSSASTA) Sukrobar salo SSA skigiparangni man•na nangenggipa October jaoni December jaona dormaharangko bon•ne on•kujaengani gimin sing•doanirangko dakgenchimoba maming aganchakaniko on•kujaenga ine u•iataha.
“Chinga re•anggipa 2021 bilsi a•bachengaoni da•ona dormaharangko tik ong•e man•kujani a•sel SSA skigiparang neng•nikaniko chakgrongna nangenga. Ma•mong sorkari chingna dormaharangko on•china tangka paisarangko chamatgenchimoba, a•dok sorkari chingni dormaharangko on•na ja•manchaka. Chinga Meghalaya a•dokni SSA skulo skigiparang dormaha gri kamrangko ka•angna gita man•jawa maina chinga salanti janggi tanganio tangka paisarangko nanga. Chinga SSA skulni skigiparang tangka paisa gri cha•a ringa gri kam ka•na man•jawa” ine AGHSSASTA-ni President LG Momin u•iataha.
“Re•anggipa bilsio an•ching a•dokni sorkari bilsi bon•na skangan chingni dormaharangko on•gen ine ma•mong sorkarini chamatgipa tangkarangko man•soe ku•rachakahachim. Indiba Meghalaya sorkari da•alona kingkingba ku•rachakatangko rakkija aro chingni dormaharangko bon•ne on•kuja” ine AGHSSASTA-ni Secretary B Ch. Marak janapatskaha.
“Chingni dabiarangko sorkari knachakjagenchim ong•ode, chinga covid-ni niamrangko ja•rikgija okgimu chake kalimanirangko dakanggen. Chinga dedrangni admission fee-rang aro monthly fee-rangko tangka paisa gong•saba dongjae gamna man•gija neng•nikaniko man•a” ine AGHSSASTA-ni Publicity Secretary Bunbunbirth R.Marak parakataha. Meghalaya sorkari SSA skulo skienggiparangni janggi tanggniko kal•ake roaming apsanaiaha. A•dok sorkari chingna dormaharangko on•jagenchimode, chinga bani miko cha•e janggi tanggen ine SSA skigiparang suk ong•gijaniko parakataha.