Tura, January 15,2022: Garo Hills ko namroro silroroatna aro nama miksonganio jinma baksa apsan melie nangrime re•mikkangna gitalgipa dol All India Republican Party of India (AIRPI) ko bikotangenba uni gitalgipa opis nok ko sonibar salni bak o oprakangaha. Ia gitalgipa AIRPI dolni President Panseng Marak, Vice President Marvin Momin, General Secretary Jim Carter Sangma maang ong•a aro chadamberangni dilgiparang ba Youth Leader rangoni President Chakin Marak, Vice President Dingrak Marak, General Secretary Ronald Bryan Sangma, Chief Organizing Secretary Thoseng Cheba Sangma maang ong•a.
RPI-ko a•bachengna skang Scheduled Castes Federation (SCF)-ko Dr. B. R. Ambedkar 1942 bilsi-o bikote chongipa jatrangna (Dalit aro Schedule castes) uni niam reti aro chu•gimik dakbewalrangko ripinge kakketgipa ramako re•dile ong•gija kamrangoniko warachakna re•mikangdilaha. Dr. Ambedkar India a•songni constitutionko segatgiparangoni saksa ong•achim aro dal•gipa gadango re•dile jinmani ku•rangko knaatna gita RPI-ko bikotna miksongachim indiba 1956-ni 6 December-o ua a•gilsak ko wate re•angna gita nangaha. 1956ni september 30-o Dr. Ambedkar SCF-ko den•gale uni siangna skang RPI-Republic Party of Indiako songskana ku•rachakaha. Uni ja•kuko ripingangskana 1957-ni October 1 tariko Nagpur-o Meeting of the Presidency ba dilgipako seoknagita tom•aha. Ua tom•bimonga-o N. Shivaraj, Yashwant Ambedkar, P. T. Borale, A. G. Pawar, Datta Katti aro Dada Saheb Rupwate bak ko ra•e N. Shivaraj-ko President songskaaha aro 1957-ni October 3 tariko gital gipa kotok-ko Republic Party of India ine songaha. Apsan bilsini Lok Sabha eleksin-o susaanio RPI kotokni sak 9 membor rang seokako man•e Dr. B.R Ambedkar ni partyko chu•sokataha.
All India Republican Party of India (AIRPI) dolni miksonganirang gipin politikal dolrangko matnange ba bobil dinge re•diljawa indiba nama kamrangko mesoke on•gen aro Dr. B. R Ambedkarni chanchianirangko a•chik a•songna ku•patie onna joton ka•gen. Bang•a changon manderang politiksna mitchianiko paraka aro gelna jotton ka•a indiba ia katta-an manderangni salantini janggi tanganio gnang. Iako membor-rangsan jakalja indiba ramram manderangba an•tangni songsul-noksulni silroroaniko nikna ba sildapatna aro namdapatroroatna na•simangna on•gimin bilko jakale, na•simangni jakaltogipa mandeko seoke joltangna dangdike on•chinagita ge•etna man•gen. Jakgitele chanchina aro an•tangni ku•rangko knaatnaba na•simangon bil gnang aro ia bilko on•gipa Dr. Ambedkar ong•a. RPI saksa sakgipinni neng•nikarangko sandie aro chanchiesa damsan ja•kuko de•gen. Re•baenggipa sal somoirango Garo Hills-ko silatna aro ku•cholsan kamrangko ka•nagita na•simangni bakrimaniko nisamsoenga ine AIRPI Garo Hills-ni Youth President Kosi Songbadna aganangaha.