Baghmara, January 15, 2022: South Garo Hills a•jani nangrimgimin dingtang dingtang NGO-rang apsan ku•monge Constitutional Rights Forum (CRF)-ni bimango a•dokni Transport Department-ni Commissioner, Geology aro Mining Department-ni Commissioner aro South Garo Hills a•jani Deputy Commissioner-ni kosako jegale badi ka•enba a•dokni Chief Secretary-na Sukrobar salo lekka sedoataha.
CRF-ni seatgipa chittio janapatani gitade,
“Re•anggipa bilsi 2021-ni December 1 tariko Geology aro Mining Department Guwahati Beltola jolni Jai Maa Coal Private Limited-ko a•palchini koilarangko Bangladesh-ona Gasuapara Land Custom Station gita ra•angchina raiko on•aha. Uana agreba re•anggipa bilsini March 25 tariko SGH a•jani Deputy Commissioner, Dudhnoi-ni Maruti Fuel dolko a•jatango napake Gasuapara-ona koilarangko salangchina raiko on•aha. Mineral Resources Department-ni Director-ba re•anggipa bilsini December 21 tariko Babul S Marak-na challan-ko on•aha aro ua koilarangko palanio jinmani damna bate SGH a•jani ning•o donggipa Rongding A•we, Dangsa A•we, Rongsa A•we, Garegittim aro Awegittim-ni koilarangko bregopaha” ine CRF badi ka•e lekka seataha.
Adita bilsirangna skangan Dangsa A•we-oni Dalu Karonggre songona 204 km ramarangko National Highway ine jinmana parakataha indiba da•al salona kingkingba ia ramarang songni rama gita 20 mm chatgipa ramasan ong•aingkua. Ia ramarangko National Highway-ona tarie on•na nangchongmota ineba janapataha. Bitminous Macadam aro Bitminous Concrete-rangko on•e sorokrangko tariosa rama sorokrang baigen aro jrimgipa truk garirang re•genchimoba maming nosto ong•ani dongjawa. Indiba Dangsa A•we-oni Dalu Karonggre ramarang Bitminous Macadam aro Bitminous Concrete gri tarigipa rama ong•ani gimi jrimgipa truk garirang re•genchim ong•ode, altue nosto ong•ako man•gen ineba CRF janapataha.
“A•dokoni ong•katangenggipa truk garirangko namedake nirikkina nanga aro uano baditana kingking koilarangko gatangenga uarangko am•sandina nanga. A•dokona napbaenggipa truk garirangko name nirok sandisoani dongja aro a•palchini baditana kingking koilarangko ra•napbaenga ukoba sing•sandiani dongja” ine CRF-ni President aro Secretary matnangaha.