Mizoramni saksa chadambe International Boxing Association Title na tarisoa
20 Jan 2022, Mizoram: Mizoram a·dokni saksa chadambe Te. Nutlai Lalbiakkima-ko Asian Boxing Council, Asia Ma·mong songjinma gimiko uni dakgrikna sapanio pangchake aro uni chu·gimik cheanirangko nigrikenba uko 2021 bilsio 105-lbs weight class-o skanggipa rank o donataha. Gnigipa-o Thailand-ni Danai Ngiabphukhiaw aro gittamgipa-o Phillipines-ni Melvin Jerusalem-koba 105-lbs weight dol-o apsan dondime nambatsranggiparangoni saksa ine channako man·aha.
India a·song oni International Boxing Association Intercontinental-o bak ko ra·chenggipa Te. Nutlai Labiakkima ong·a aro Indiani itihas-o skang gipa ong·a. Mizoram a·dokni Siaha songoni bilsi 24 onggipa boxer-ko Zokeite ineba biko namnikgiparang okamna namnika ine Te. Nutlai u·iataha. Ua an·tangni boxing ba dakgrikna changa sapaniko 2011 bilsi-o parakana a·bachengaha aro an·tangni songna rasongko ra·bana man·ahani gimin ua songtangni manderangko demitela ine u·iataha. 2018 bilsio, India a·songni boxing itihas-o, a·gilsako skanggipa bi·apko manne dongsogipa Olympic Gold Medalist Te. Hansanboy Dusmatov baksa Kazakhstan songjinma-o dakgrike skanggipa Rank-ko Nutlai ra·sekskaaha.
“A·gilsako IBA title-ko professional aro semi-professionalrangnasan on·aia. India a·songo professional boxingko kal·gipa namen komia indiba amateur boxingsa mingsingpilskaa. Anga an·tangko namdapatna aro gisikni bilko bilakbatatna gita antangko rakgen tarisoengaha. Angna skigipa 2011 bilsi o National Games o Silver medal-ko man·gipa Sir. Mampuia ong·a. Angni gisiko an·tangko Indiani a·gilsako skanggipa champion ong·na tarisoenga aro angni namnikbatsrang gipa Filipino boxing legend Manny Pacuiao gita ong·na tarisoenga” ine Te Nutlai aganaha.
Te. Lalbiakkima 2022-ni August 27 tarikko International Boxing Association-o bak ko ra·na gita an·tangko rakgen tarisoengaha aro a·gilsako mingsinggipa bimingrang jekai WBO, IBF aro WBC title-na an·tangni miksonganirangko il·lengatgija chu·sokatna kamrangko ka·engaha.
Mandeni amsokgijani mamingba dongja. Salgro salaramni manderang dingtang dingtang kal·susaani a·barango a·gilsakna sakkirangko on·ani gnang aro bang·a rasongrangko ra·baaniba gnang. Kal·susaa oni git ring·a ona, a·songko dila oni a·songna warakchaka ona maming dakeba on·gilanio komiani dongja. Hai an·ching Te. Nutlai Lalbiakkima-na nama skanirangko onna aro an·chingni bi·anirango uko gisik ra·na. Uni cheanichi a·songna aro salgro salaramni manderangna rasongko ra·bachina.
Jachipchangko on·gilgipa: Marine Pro Boxing Promotions