South Bangalore, April 11, 2023: Southern Bengalore jolo donggipa Lakshmi Tatma-ni janggi tanganio aiao inmangipa obostako chagrongaha. Ua jak ge•bri aro ja•a ge•bri ong•e me•chik bi•sa saksako atchiaha, ia obosta namen bebe ra•na ampilgijani ong•aha.
Lakshmi Tatma-ni jak ge•bri aro ja•a ge•bri ong•e atchigipa nikronggija me•chik bi•sa da•o bilsi 2 gapaha aro ua me•chik bi•sa be•en bimang an•seng baljoke dongenga ine parakaha.
Indake ong•genchimoba, Lakshmi Tatma ua bi•sako ka•sagija, simsakgija dake galchipjaha, indiba namen mande ra•bee simsak nirokaha, maina ua bi•sa Indian-rangni olakkigipa Vishnu Mite-ni bimangosa atchiaha ine be•be ra•aha. Maina uni bimingan gam aro rasong gnanggipa Mite Lakshmi-ni bimingchi mingaha aro ua Vishnu-ni jikgipa ong•achim.
Lakshmi-ni ma•a pani paraka gitade, je songo uamang dongachim, ua songni manderang Lakshmi-ko namen mande ra•achim, maina ua Mite-oni atchigipa mande ong•a ine uamang bebe ra•achim. Indiba Scientific-ni talatani gitade, Lakshmi-ni okningo ong•ronggija obosta ong•ani a•selara, bimang sakgniko apsan bimang ga•sao nangdimata chu•gimik ong•jaha, ka•mani bakrang dingtange atchiataha. Indiba bi•sani gitade maming namgijani ong•jaha, indiba Lakshmi-na bang•a neng•nikani ong•skaha.
Indaken ua bi•sako Mite-ni demechik ine sakantian olakkitokaha. Lakshmi-ni ma•a paa da•onaba mittele, uni ja•a jakrangko ratgale sanna man•ode, ramram me•chik bi•sa gita skul re•na, ong•kat re•ramna man•gen aro dal•ahaode darangba uko ong•ronggija atchia ine chanchijawa. Indiba uni ja•a jalrangko rate sanna bang•a tangkarangko nanggen, ine Lakshmi-ni ma•a paa jumang niksoaha.
Uandake, uamangni jumang niksoa gita rasong gnangbee Dr. Sharaп Patil-ni dilanichi sandirikigipa dol sak 30 Surgeon-rangna baten, ra•bie kam ka•na gita ja•ku de•aha. Indake Dr Patil, Lakshmi ma•gipa pagipani chanchiako gisik ra•ate, jak ge•bri aro ja•a ge•bri atchigipa me•chik bi•sako indin surgery ka•a konta 24-ni gisepon, Southern Bengalore songjinmani hospital-o chu•sokaha. Surgery ka•mittingo Dr. Patil, chongipa bi•sani ja•a, jak gitchae atchiako rate galaha aro ua bi•sako sakgipin bi•sarang gita ramram bimang ong•ataha. Ian aiao inmanbeani kam ong•aha ine koboro parakaha.
Surgery ka•ani ja•mano Dr Patil, “Da•o ua sakgipin me•chik bi•sarang gita apsan janggi tangpana man•gnok” ine kusi ong•aniko parakaha.
Lakshmi-ni pagipa Shambu, su•gipani ramram bimang ong•e nampilako nike namen kusi ong•bee aiao inmapilaha. “Chingade mamingkon aganna changjaha, chinga namen dokdorko mittelna sika, maina ua an•tangni u•iani aro changa sapaniko a•gilsak gimikna da•alo parakaha. Darangba angni nokdango mai ong•a, gam jin donga dongjako ma•sija, chingasa ma•siaijok chingni dukkode, indiba da•alo indin surgery ka•e, angni su•gipako janggi jokataha aro ramram bimango janggi tangona cholko on•aha. Dr Patil-ni Isol gita chacha ong•aha” ine Shambu Dr Patil-ko namen de•mittelataha.