Shillong, May 9, 2022: India a•songni dingtang dingtang a•dokrango LPG Cylinder-ni dam barioba, Meghalaya a•dokni MDA sorkari ia obostani bidingo maming ja•kuko de•jani gimin, AITC dolni dilgiparang matnangaha.
Koborko man•soani gitade, AITC Pynursla Block-ni Joint Secretary Dominic S Wankhar, ” LPG Cylinder-ni dam bariani bidingo MDA sorkarini darangba maming kattarangko aganjaenga aro jegalaba jegaljaenga. Uasan ong•aigija a•doko to-ni dam bariani bidingoba MDA sorkari maming ja•kuko de•ja. Maina uamang to-ni tax-rangko komiatja. Unbaksana a•doko bang•a bosturang aro cha•ani ringani damrang barianirangko nikna gita man•a.
Da•ororoni tangka gong 500-de gong 100 gitasan ong•aijok. Re•anggipa Sonibar salo mangmang LPG Cylinder-ni dam gong 5-na baridapaha. Ian anti 6-ni ja•mano baridapatgipa dam ong•a. Non-Subsidy LPG Cylinder da•o gong 949.50 damoni 999.50 damona baridapataha.
Indake ong•anichi bang•a kangal cholgri manderang neng•nikanirangko man•enga, noko gas dongjagenchimode aro am•bol so•aniko beng•genchimode uamang maikai song•e channe cha•pagen” ineba Wankhar janapataha.