Baghmara, March 1,2022: Re•anggipa February jani 28 tariko SGH a•jani pulisrang pekgipa bosturangko Malikona-o donggipa saksa bading chiwalenggipa mandeona ra•baenga ine koborko man•soaha.
Pulisrangni rake kam ka•anichi pekgipa bosturangko ra•baenggipa mande Merazul Hoque-ko rim•enba sing•sandianiko dakangaha. Rim•a man•gipa mande pulisrangko pekgipa bosturangko Bangladesh-ona bading chiwalenggipa mande Babu Das-ni nokona rimangaha aro uni nokoniko pulisrang gisim aro gitchak rongni jolao sorkarini jakkalna beng•gipa gusuni sam Phensedyl 100 ml-ko te 98 man•aha.Me•chik pulis dol Usha Das-ko sing•sandie nion ua segipani pekgipa bosturangko donnue donenggipa biapko pulisna mesoke on•aha aro uko kulie nioan pulisrang kilding gitchakchi wene dongipa plasticni ning•o tangsim rongni plasticko packet bri man•aha aro ua plasticni ning•o pekgipa bostu Yaba, Methaphetamine tablet rong 1125-ko man•aha uko toe nion gram 109 ong•achim.
Pulisrang ua pekgipa bosturangko sorkarini jakkalna beng•gipa gusu samrangko songsul Bangladesh-ona watatna am•enga ine parakaha.