Shillong, March 1, 2022: A•chik a•songni chadambe saksa Te. Zerico R. Marak Symbiosis International University (SIU), Pune-o PhD-ko bilsi 5 poraie matchotaha.
“Anga bilsi 5-na neng•skime duk chakgenchimoba, gisiko ka•dimean baksa an•tangko nambate chu•sokna jotton ka•aha. Angni Supervisor, Symbiosis School of Banking and Finance-ni meligipa Professor Dr. Deepa Pillai-ni angko nirok simsake chu•sokatna jotton ka•atanina aro angna miksongako ma•siatahani gimin u•ie ma•sie ra•na man•aha. Unbaksana anga Dr Sanjay Pohekar aro SCRI dolko angni nangan somoio pangnan dakchakna aro dongkame skie on•anina mittelna sika. Angni ma•a Paa aro nokdangni manderang duk chake angko chu•sokatna ang baksa dongahanina uamangkoba mittelna kusi ong•a aro angna nama skaniko on•gipa sakantikon mittela. Angni PhD Research-ko dakengimitingo angna dakchakgipa sakantikona anga mittelatenga.
Pilakna bate, dal•batgipa Nokgipa Isol-ko mittelna kusi ong•a, jekon angna pattiaha aro neng•skimanirang sokbagenchimoba maming champenga gri angko chu•sokna gita cholko on•aha” Zerico Marak u•iataha