Shillong, April 24, 2022: Assam aro Meghalaya a·dokni sima arini bidingo Meghalaya a·dokni Skotong Minister Conrad Sangma, a•doktangni manderangko togie chonnikani ong·enga ine Sonibar salo, warachakenggipa dolni dilgipa Dr Mukul Sangma matnangataha.
Conrad Sangma manderangko togina jotton ka·anichi a·doktangni manderangna so•sojengjengko ra•bae sima ari jolni manderangko duk mikchi ong•atenga. Ian Dr Mukul Sangma-kosan chonnika ong·jaenga, indiba a·dokni manderangkosa chonnika ong·enga ine Mukul aganaha.
Assam-ni Skotong Minister baksa MoU-o soi ka·grikani gitade, Meghalaya sorkari, Khanapara, Ganesguri, Mallang Salbari, Mallang Siminaguri aro Maikhuli songrangko Assam a•doko chapataha ineba Dr Mukul Sangma parakataha.
A•dok damgnini gisepo so·sojengjeng ong·enggipa biaprangko man·pilna aro Meghalaya a·dokon donchina gitasa 2011 bilsio Assam sorkarina lekkarangko on·ahachim. Koborko man•soani gita Assam aro Meghalaya sorkari on·sregrikna ine aganaha, indiba sani aro badia a·arangko uamang on·na am·skaenga ine Mukul Sangma sing·doangaha.
Da·o so·sojengjeng ong·enggipa biaprangna agreba gipinrangko uamang namatna kam ka·engaha ine skotong minister aganenga, indiba uarangko name ma·sijaenga. Ia obostaora mai neng·nikanirang dongachim, ukon ua name ma·sikuja. Uni giminsa angni gisiko kenchakani ong·kataha aro Assembly-oba anga iani gimin baditaba chang an·tangni kenchakaniko parakahachim, indiba uamang angna ka·dingstekaha ine Mukul Sangma aganaha.
Dr Mukul Sangma-ni parakata gitade, 2011 bilsio meligrikna man·gijagipa biaprangni bidingo a·kanganiko dake lekkarangko on·atani ja·mano, Assam sorkari, changsaba iani bidingo agangrikna gita re·mikkangjaha. Iani bidingo Assam sorkari Dr Mukul Sangma baksa agangrikna nanggenchimode ia a·arangko Assam-na on·jawa ine uamang ma·sia. Ia a·arangko Assam-na pakwate on·jawa ine uamang ma•sienba Conrad Sangma-ni somoio ia kamko matchote ra·na man·aha ine Dr Mukul Sangma matnangaha.
Ia biaprangko Assam sorkari man·rikna sikani giminsa changni chang Conrad Sangma baksa tom·anirangko ong·ataha aro December, January jarango aro chuttini salrangoba uamang tom·anirangko ong·ataha ineba Mukul Sangma aganaha.
Da•o so•so jengjeng ong•enggipa Malchapara, Mallang Salbari, Mallangkona songrangara Meghalaya a·dokni ning·on ga·akachim ineba talatangaha aro ia songrango maming meligrikgijani aro so·sojengjeng ong·anirang dongpajachim ine parakataha. Maikhuli songko bak ka·e on·ahani giminba Skotong Minister-ko Mukul Sangma sing·doangaha. Iani giminsa changni chang Meghalaya sorkariko, MoU-o soi ka·jachina aganahachim,” ineba ua agandapataha