Williamnagar, April 25, 2022: East Garo Hills a•jani Deputy Commissioner (DC) aro District Sports Officer (DSO) bakrime North East Festival, 2022 aro Azadi Ka Amrit Mahotsav-ko maniani bak gita a•jao km 10 mangna kat•susaaniko ong•atanggen ine u•iataha.
Ia kat•susaaniko re•baenggipa April 28 tariko ong•atanggen aro ia kat•susaanio me•a, me•chik gimikan re•bae bakko ra•ena man•gen. Kat•susaanio skanggipa, gnigipa aro gittamgipa-o chegipa manderangna tangka gong hajar 5, hajar 3 aro hajar 2-ko boksis on•gen ine parakataha.
Uni gimin gisiko nanggipa chadamberang District Sports Office-ona re•ange bimingtangtangko segate donnena gita man•gen. Ia kat•susaaniko Home Guard aro Civil Defence office-oni a•bachengatgen ineba u•iataha.