Tura, December 21, 2022: Meghalaya Sorkari bang•a songrangko namroro-silroroatna rakbee kamrangko ka•engon, Butbar salo Skotong Ministet a•dokni sak 23491 game ge•e cha•giparangni janggi tangani cholrangko tang•doatna aro namdapatna FOCUS aro FOCUS+ Scheme-ni tangkarangko suale on•angaha. Je manderangna tangkarangko sualahachim, ian gnigipa changna dal•batgipa program ong•aha.
Skotong Minister, West Garo Hills a•jani Rajabala aro Batabari songrango game ge•e cha•gipa nokdang ge 2,822-na ‘FOCUS+’ Farmers’ Welfare Program-ni ning•o tangka gong kror 1.41-ko sualangaha. Ia ‘FOCUS+’ko a•bachengatanichi Meghalaya a•dokni pilak Producer nokdangrangna bang•a namgnirangko on•aha. Ian Meghalaya a•doko game cha•giparangni dal•batgipa Welfare Program ‘FOCUS’-ara (Farmers’ Collectivization for Upscaling Production and Marketing System)-ni bak ong•a. Ia ge•gni Scheme-rang Focus aro Focus+ Meghalaya a•doko game cha•giparangna nokdangprako gong hajal 10,000 tangkako on•ne dakchakani ong•a.
Uandake gong lak 39 tangkarangko ge 14 Self-Help Group-rangna (SHG) sualangaha. Indake, FOCUS+ni gita chu•gimik tangka gong kror 11.75 tangkarangko sak 23,491 manderangna, Farmers’ Welfare Program-ni ning•o suale on•angaha.
Iasan ong•aigija, Rural Backyard Piggerry Scheme, ‘PROGRESS’-ni ning·o, mang 1200 wak bi·sarangko bima mang-3 aro bipa mangsako West Garo Hills a·jani sak 300 game ge•e cha·gipa nokdangrangna sualangaha. Una agreba, Kuroiler do·o High Yielding Variety-ko sak 100 manderangna suale on•angaha. Ia PROGRESS Scheme-o game cha•giparangna dingtang dingtang jilla-kaanirangko on•ne pangkamgipa janggi tangani cholko ra•baenga. Ia Scheme-chi sak 10,000 kangal cholgrigipa game cha·giparangna dakchakaniko on·na krengenga aro iana agreba, a·doko wak aro do·o be·enrangko bariatna jotton ka·enga ine aganangaha.
Ia tom•anio, Skotong Minister Conrad K Sangma jinmana aganprakengon, “Chinga ia tangkarangko aro jilla-kaanirangko game cha•giparang, Self Help Group-rang aro Village Organization (VO)-rangni namgnina suale on•na man•ahani gimin namen kusi ong•a. A•dok sorkari Meghalaya a•doko game ge•e cha•giparangni janggi tangani gadangko tang•doatna, neng•takgija kamrangko ka•enga. Chingni dakna miksonganide uamangna pangkamgipa janggi tangani cholrangko bang•bate on•na, uamangni man•gnirangko changgni batatna miksongani ong•a. Batanggimin bilsi bri atao, chinga bang•a program-rangon nama biterangko ra•bae chegipa ong•aha” ine Skotong Minister aganangaha.