SGH pulis kate dongenggipa mandeko rim•na man•aha
Baghmara, April 10, 2022: South Garo Hills a•jani pulis, Siju Pulis Station-ni O/C skotong ong•e dilanichi re•anggipa April 8 tarik Sukrobar pringo saksa bilsi 43 ong•ipa Polti N.Marak-ko, Siju PS-ni ning•o donggipa Jadi Gindam buringoniko rim•aha ine kobor man•aha.
Ua mande Baghmara Women Pulis Station-o case No.03 (02) 2022 u/s 5 (j) (ii) (k) (L) 6 POCSO Act-oni katchipe dongengani gimin, pulisni rim•na sandienggipa aro wanted ong•gipa mande ong•achim ine koborna parakaha.
Pulisrang ua mandeko Sukrobar pringo Jadi Gindam buringoniko chadrape rim•na man•aha ine u•iataha.