Rongrong MDC Resubelpara Civil Hospital-ko ta•rake matchotatchina skotong minister-na lekka sedoata

Resubelpara, May 11, 2022 : North Garo Hills a·jani Resubelpara Chidaret-o rikenggipa pallang ge 100 chakgipa ba 100 bedded Civil Hospital-ko da·onaba rika matchotkujaengani gimin, ta·rake kamrangko matchotatchina Rongrong elakkani MDC, Te Rinaldo K. Sangma a·dokni Skotong Minister Pa Conrad K Sangma-na lekka sedoataha.

Rinaldo K.Sangm-ni parakatani gitade, pallang ge 100-na rikenggipa Civil Hospital-ko re•anggipa 2019 bilsini March jaonin rikna a·bachengataha, indiba a•dok sorkari ia hospital-ko rikna gita tangka paisarangko chamatjani gimin re·anggipa 2021 bilsioni ia civil hospital-ko rikenggipa contractor-rang dontongna nangaha.

“Da·odipet Resubelpara-o Community Health Centre (CHC) ge•sasan dongani a•sel ia health centre-o bang•a sagiparangko sanna gita man•jaenga aro ia CHC-o chu·onga gita bosturangba dongjae bi·sa atchinagipa me·chikrangko aro dingtang dingtang sagiparangko sanna gita man•jani a•sel bang·a changrangon, Tura, Guwahati, Goalpara aro gipin sanchakram biaprangchi ra·angna nangani gimin namen neng·nikaniko man·enga. Mongsongbate an·o donggipa ma·giparangko chel·a biaprangchi ra·angna gita namen kenchakaniba ong·a, uni gimin Resubelpara Civil Hospital-ko ta•rake matchotatna nangchongmotenga,” ine Rinaldo K.Sangma janapataha.

Resubelpara-o rikenggipa pallang ge 100 chakgipa Civil Hospital-ko ta·rake matchotatna man·genchimode, North Garo Hills a·jao songdongenggipa manderangna aro mongsongbate songadamrangoni sagipa manderangko sanna re·bagiparangna bang·a dakchakani ong·genchim.

Uni gimin North Garo Hills a·jao songdongenggipa manderangni namgnina anga ia civil hospital-ko ta·rake matchotatna gita tangka paisarangko chamatpachina mol·molatpaenga,” ine Rinaldo K.Sangma, Skotong Minister-na seatgipa chittio janapataha.