Resubelpara, Feb 26, 2023:Mendipathar elakkani Congress candidate, Timjim K.Momin Subrobar salo Mendi Salpara-o bon•kame campaign ka•angaha ine koborna u•iataha.
Ia bon•kamgipa campaign-o Timjim Momin Salpara jolni manderangko ku•monge, Meghalaya a•doko dingtanganiko ra•bana sakantini Congress baksa bakrimaniko aro jak on•paniko nangenga ine aganangaha.
Indake Salpara jolni bang•a manderang Congress candidate Timjim Momin-na chakpaniko on•ne kamko ka•angna kusi ong•tokenga. Timjim Momin jat aro a•songna kakket aro bebeo kamko ka•anggen ine ku•rachakangaha.
Uni gisepon Meghalaya a•dokni gitcham Skotong Minister Pa Salseng C.Marak-ba Timjim Momin-na chakpaaniko on•ate, an•tangni demechik Silje K.Sangma-ko kam ka•pachina watataha ineba u•iataha.
Ia program namen chu•sokna gita man•aha aro bang•a chadamberang Congress party-o bakrime kamrangko ka•engani gimin, Congress party namen bilakbatenganiko nike Congress dilgiparang mittelpilaniko parakataha.