Dos dakgipa CRPF-ni case-ko ra•galchina me•chik pulis officer didiaha ine jangatanina talatskaa

Williamnagar, May 9, 2022:Adita salna skang facebook-rango vedio watpriprae, Williamnagar Women Pulis OC-ko matnanganina East Garo Hills Pulis ma.talataha.

East Garo Hills Pulisni talatani gitade, duko ga•akgipa me•chikma saksa Ma Peboni M.Sangma-ko CRPF sipai saksa April 2 tariko Rongreng Baiza cha dokkano cha ringna nape til•ekdrana jotton ka•ani bidingo, Ma Sangma CRPF sipaini kosako Williamnagar Pulis Station-o badi ka•gimin mamla (case)-ko ra•galpilchina ba withdraw ka•china duko ga•akgipa me•chikmako, Williamnagar Women Pulis OC didiaha ine jangatani gimin talataniko on•atskaha.

Ia mamlani bidingo East Garo Hills a•jani SP, Pa B A.Sangma sing•sandianiko dakenba ia mamlani bidingo nipiltaianiko dakanio pilak nanga kamrangko Investigation Officer (IO) matchote kam ka•manaha ine nikaha.

Indake ia mamlani bidingo SP ta•rake Chargesheet-ko watchina IO-ko ge.eataha. Uandake ia mamlani Chargesheet-ko Sombar salo Williamnagar Session Court-na watataha ine SP parakataha.

Ia mamlani bidingo dos dakgipa CRPF sipaiko CRPF-ni dal•batgipa authority uni kamoniko dondipataha ineba SP parakataha.