22 Jan 2022, Shillong: Meghalaya SSA Schools Association (MSSASA) dol ni ka•rimskarang Meghalaya a•dokni bilsi 50 gapaniko maniani sal o a•dok sorkarini kosako re•jomaniko aro badi ka•anganiko dakangaha. Kobor rangko man•soani gitade Kyndailad songni skigiparang a•dokni sorkarini kosako uamangna chu•gimik dormahako on•kujani bidingo jegalenba jingjengatanirangko dakangaha aro attamni bak oba uamang duk ong•aniko mesokna gita mom-bati ba candle ko ra•bite re•jomaniko dakangaha.
SSA Skulo skigiparangni Right to Information (RTI) o pangchake aganani gitade, ma•mong sorkari 2021 November jani 9 tarik o kror 73.51 tangkarangko aro December jani 22 tarik o kror 73.51 tangkarangko SSA Scheme gita Meghalaya a•dokna chamatahachim. Indiba Education Minister Pa Lakhmen Rymbui-ni aganani gitade tangka kror 52 kosan Meghalaya a•dokna chamataha ine jinmana parakatenba jajaaniko ra•baaha.
Meghalaya Day ba Meghalaya a•dokni bilsi 50 gapaniko Jawaharlal Nehru Stadium (Polo Ground)-o a•dokni dilgiparang aro a•dok-ko chalaenggipa sorkari-ni nokkolrang aro okamako mangipa dingtang dingtang dolni manderangni salko kusi ong•e maniengon, HYNM sorkarini kosako matnange re•jomaniko dakangaha. Hynniewtrep National Youth Movement (HYNM) dolni karimskarangba sukrobar salni bak o Inner Line Permit (ILP) aro a•dok-o niam gri koila rangko bading chiwalaniko dontongatchina re•jome a•dokni manianio bak ko ra•gija nisan gitchak ko de•doe dabianiko dakangskaha.