Williamnagar, April 28, 2022: Bilsi 2018-ni January 9 tarikon Williamnagar songjinmao education institution-ni gita Polytechnic Kolege-ko rika matchotani ja•mano sorkari oprake on•ahachim, ua matchotgimin polytechnic kolege-ko maina da•ona kingkingba kuligija donchipenga ine Niksamso A•chik Society (NAS) sing•doangaha.
East Garo Hills a•jani chadamberang gipin biaprangchi re•ange changa sapaniko skie ra•na gita cholko man•pajani gimin a•jatangon polytechnic degree-ko skie ra•na man•pagen ine bang•a ma•a parangan ka•donge senge dongengachim. Indiba ru•uta bilsirangna ia kolege-ko matchotahaoba mamingkon a•bachengatuja ine East Garo Hills a•jani manderang suk ong•gijaniko parakataha.
A•dok sorkariko chalaienggipa dilgiparang mamingkon simsakja aro Meghalaya Education Department-ni gitaba iarangko nirok simsakani dongja ine NAS janapataha.
Da•alo chadamberangni skie ra•aniko namdapatna aro tang•doatna on•gimin gam ba skie ra•chakram biapko indin donaniara a•jani chadamberangna dal•a gimaani ong•a. Uni gimin skie ra•aniko indin gimaatna nangja ine NAS-ni President Tengrak Marak janapataha. “Chinga Meghalaya sorkariko mol•molna sika ia Williamnagar Polytechnic Kolege-ko ta•rake skie on•aniko a•bachengatna nanga.Jedakode A•chik a•songoni chadamberang nama skie ra•aniko man•china, ian chingni nangnikani ong•a. Ia Polytechnic Kolege-na rikgimin noko ru•uta bilsirangonin CRPF Camp dake jakkalaniara kraani ong•ja aro Education institution-ni biapo CRPF sipairangko dongchakna on•aniko NAS raken jegalangaha.