Tura, April 28, 2022: Tura Table Tennis Association (TTTA), Department of Sports and Youth Affairs aro a•dokni Table Tennis Association baksa bakrime India-ni Table Tennis ka•lanio nambatsranggipa manderangna Promotional Event-ko ong•atangaha.
Ia promotional event-ko April jani 26 tariko WGH a•jani Indoor Sports Hall-o ong•atangaha aro ia event-ko ong•atanio Garo Hills-ni MP Agatha Sangma mongsonggipa sokgipa ong•e bakko ra•angaha. Indake ia event-o a•jani Deputy Commissioner Ram Singh-ba bakko ra•angpaaha. TTTA-ko 1982 bilsion kuliaha ineba parakangaha.
“Kal•susaaniara mandeni be•en bimangko mangrake rakkina dakchaka. A•jao National aro International Tennis kal•gipa donganichi bang•a chadamberangko apsan kal•aniko kal•pana cholko man•a baksana uamang gita ong•na sikani gisik sokbae namgijaoni gelna gitaba dakchaka.
Tura-o rikenggipa gital PA Sangma Stadium, chadamberangko kal•susaanio International level-ona sokdoatna dakchakaniko on•gen” ine Agatha Sangma aganangaha.
Ia promotional event-o India-ni mingsing minggamako man•gipa Tennis Player-rangara Sharat Kamal Achanta, Reeth Rishya, Archana Kamath, Sanil Shetty aro Kamlesh Mehta, jemangan India a•songko International level-o kal•e mesokrongachim aro a•songni bimingo kal•rongachim uamang bakko ra•angaha.Unbaksana a•dokni Tennis Player Suranjit Dey aro Tanushree uamangni tennis kal•anio changa sapaniko jinmana mesokangskaaha.
Tura Govt. Kolege-ni Principal aro TTTA-ni President Terence D. Marak rimchaksoaniko kattarangko agananga baksana Tura Table Tennis Association-ni cheanirangkoba jinmana prakangjolaha.