Tura, August 17, 2022: A•chik Organisation for Social Welfare (AOSW), Garo Hills Autonomous District Council-ni Court Bench-ko Williamnagar-o songchina dabiangaha.
Batanggimin salrango Williamnagar Bar Association, Garo Hills a•jaona High Court-ni bench-ko ra•bae on•china dabiangaha.
“Garo Hills a•jani bang•bata manderangan jako kam dongtokja aro 70% manderang ge•e game cha•giparangsa ong•a. Indake ong•enggon, uamang Tura songjinmao donggipa GHADC-ona re•rurate an•tangtangni nanga lekkarangko tarina gita neng•nikaniko man•enga. Manderang indita chel•a ramaoni re•baoba somoi gita kamrangko matchotatna man•jagenchimode, duk mikchi ong•e re•angpilna nangaona soka. North Garo Hills, South Garo Hills aro East Garo Hills a•jani manderang adita kantarangna songre songgabatani ja•manosa Tura songjinmaona sokenga. Uni gisepon GHADC-ni revenue komiani a•sel, Garo Hills-ni kona noksiko donggipa manderang ta•rake sokangna ramarang namjani a•sel mitam revenue-rangko man•rikjaha, mitam tax-rang bon•chipa, mitam business-rang sichipa iarang pilakan somoi gita office-o kamrangko matchotatna sokbana man•jani a•sel ong•a. Williamnagar songjinma GH-ni pilak a•jarangoni sepangbatgipa songjinma ong•a indake North aro South-ni manderang sepangbatgipa Williamnagar songjinmaona re•bae kamtangko ta•rake matchotatna gita cholko man•gen. GHADC-ni Court Bench-ko Williamnagar songjinmaona ra•bagenchimode, uamang gimagimin tax, sichipgimin bading chiwalanirangko a•bachengataina gita cholko man•gen” ine Organization-ni General Secretary Premiar Sangma prakataha.
Uni gimin kamrangko altubatatna aro manderangni neng•nikanirangko komiatna gita GHADC-o Court bench-ko Williamnagar-ona ra•bana nangchongmota ine AOSW dabiangaha.