Trade aro Licencening, Taxation Department-ni Superintendent jatko cha•boka
Tura, Aug 17, 2022: NGEA-ni gitcham General Secretary aro songsalna kam ka•enggipa Flaming B. Marak, Garo Hills Autonomous District Council (GHADC)-ni Trade aro Licensing, Taxation Department-ni Superintendent, re•anggipa July 7 tariko Tura Pulis Station-ni Officer In-Charge-na seatgimin chittiko ra•galpilchina didiataha.
Flaming Marak-ni seatgipa chittio GHADC-ni Trade aro Licensing, Taxation Department-ni Superintendent-ni kosako sing•sandianiko dakchina mol•molataha aro ua A•chik jatko ong•gija dilsretaniara GHADC-ni gitcham dilgiparangni niam tarie donanggimin, Garo Hills District Council-ni (Trading by Non-Tribals) Regulation 1957-ko pe•aha. Uni gimin uko kakket bichalona ra•bana nanga ine Flaming Marak, Tura Pulis Station-ni Officer In-Charge-na chittio janapatskaha.
Ia a•selko nikani ja•mano u•iatna nanggniara, District Council-ni tarigimin niamko Garo Hills District, (Non-Tribals) Regulation 1957-ni Section 3-o pangchake bading chiwalani gimin janapataha, “Control of Trade by Non-Tribals ba Banggal-Rorirangni bading chiwalanio sason ka•ani, a•jao atchikapgipa banggal rori ong•gijagipa jatsa bostuko ge•sa ba uana bate wholesale aro retailer business ba chona rema dokkanrangko First Schedule-ni Part “A”-o janpgimin niam gita badingna nanggen, ong•jaoba je bostuko ge•sa ba bang•a dingtang dingtang bosturang jekai galamal dake Schedule-ni Part “B”-o pangchake donkamgipa dokkanko rike ong•jaoba dikdiksana dokkanko rike ba mi dokanrang rama a•samo dokkan rike ba gipin jatna cholko sandie hotel ong•jaoba cha dokkan ba be•en dokkan ba cha•ani cake ba biscuit dokkan bolni bostu dkokan ba jedakgipa bosturang ong•achim, jekon palna miksongengachim, ong•jaoba tarina miksongenga jilmana parake palna gita dingtangmancha bosturangko seoka. Ia bading chiwalanirangko a•bachengna gitaba Executive Committee-ni raiko man•ne ba Licensing Officer-ni seokaniko man•ani ja•manosa License-ko jakkalna gita man•gen”
Kosako u•iatgimin niamrang namen talatanirangko on•aha aro Garo Hills-ni kona noksik gimikchin banggal rori ong•gijagipa jat Garo Hills-o atchiahachim uamang wholesale aro retailer business-rangko je bostu ge•sako ba una bate First Schedule-ni Part “A” o janapgimin gita ka•na man•gen ong•jaoba ge•sa galamalni rokomari bosturang (Commodities of General merchandise)-ko a•chengna gita man•na. Aiao inmanpilani kattade, jensalo GHADC-ni Trade aro Licensing, Taxation Department-ni Superintendent July 7 tarikni chitti Memo GDC-5/Genl.Cor/TNT/92/III/442-o u•iatani gitade, Taxation Department-ni Suoerintendent Banggal Rori ong•gijarangnasan trading licence-rangko a•jani manderangna tarigimin bosturang jekon badingchiwalna gita songni antirango ba antini bajalrango palgipanasan on•aha ine officer janpataha. Tamakuko badingna me•su samjakrang baksa man•a ine janapjolaha. Je kattarangkon GHADC-ni Trade aro Licencening, Taxation Department-ni Superintendent chitti seachi talatachim ua Garo Hills District (Trading by Non-Tribals) Regulation 1957-ni Section 3-ni kosako niamrangko ja•rikgija ACT-ko pe•aha. Uni gimin GHADC-ni Taxation Officer-ni July tariko sualgipa licence aro chittiko dontongate, chu•sokatgija bon•ate ra•galchina aro officer-ni A•chik jat gimikko tol•e dilsretgipa kamrangko niroke, sing•sandianiko dake, kosako janapgimin ACT-ko ja•rikgija aro uni kragijagipa kamni bojao niam gita kakket bichalko on•china gita Tura Pulis Station, West Garo Hills-ni Officer In-Charge-na Superintendent-ni seatgipa chitti-o pangchake Flaming Marak, GHADC-ni CEM-na see mol•mole lekka sedoangaha.