Tura, July 24, 2022: West Garo Hills a•jani Superintendent of Pulis (SP) Vivekananda Singh Rathore-ni The Shillong Times songbad-o me•chikma dolko badi (case) ka•aha ine parakatani bidingo Womens’ Trading Organisation (WTO)-ni dilgiparang namedake talna gita Sonibar salo Tura main thana-ona re•ange sing•sandianiko dakon thana-ni OC sawa badi ka•ahachim aganjaha ine WTO-ni President Monikha Momin koborna u•iataha.
Monikha Momin-ni u•iatani gitade, re•anggipa somoio dolbri NGO-rang licence gri ra•bagipa birirangko am•sandiani gimin SP uamangko thana-ona okgamate NGO dilgiparangko rim•e walsa thana-o donna am•aha. Ua walo Pritam Arengh aro Dalseng Bira Momin, ma•gipa dolko okgame dakchakaniko am•aha. Indiba da•alo ma•gipa dolko badi ka•ani somoio ua NGO-rang bachi gimaskaha ine Monika Momin suk ong•gijaniko parakataha.
Unbaksana re•anggipa May jao birirangko licence gri ra•baenggipa sak 6 manderangko SP an•tangan Suo-Moto-o badi ka•aha, uamanga Nerush Manda Sangma, Taposh Mondol, Sourav Kundo, Chandan Ghosh, Anil Jain aro biri salgipa gari driver-ko section 120(B)/379/468/406/407/420 IPC-o rim•aha.
Indide da•alo ma•gipa dolni licence gri sada-biri ra•baenggiparangko sandie champengatako maina SP-ara ma•gipa dolko badi ka•skaha, iani bidingo SP ma•gipa dolna talataniko on•na nanga aro badi ka•gipa dolko parakna nanga. Sawamancha WTO-ni kosako badi ka•achim, uko parakjaode, SP an•tangba WTO-ko badi ka•gipa dol baksa jak dongna nanga aro maiba man•gniko man•na nanga. “Chinga ma•gipa dol SP-ni kamko raken jegala” ine Monikha Momin parakataha.
“Chinga re•anggipa jao licence gri Tura bajar-o palenggipa sada-birirangko sandie, rim•a man•gipa sak 3 manderangko badi ka•ahachim. Ua manderanga IP Gupta, Sanjay Prasad aro Hari Gopal uamangko SP da•onaba rim•kuja. Maini gimin chingni badi ka•gipa manderangko SP rim•kujaenga” ineba WTO sing•doangaha.
“Chinga tobacco-ko ra•bana man•jawa inede champengja, indiba tobacco-ko ra•baode licence tarie ra•bachinasa aganaha. Chinga Tura-na agrede Rongram dokkanrangko champengata ingipa kakket ong•ja tol•e matnangasan ong•aia. Una agreba chinga Health Administration-oniko permisaion man•ne cigarette biri palna man•jawa ingipaba tol•asa” ine WTO-ni President jegalataha.
A•chik ong•e, A•chik a•songon licence gri bading chiwalna man•jaode, mingantiko supply ka•na licence tarina nangode, maina biri supply-rangara grocery licence-chi gimikkon supply ka•na on•skaenga ineba sing•doangaha. A•chikrangna a•jatangon indakgipa niamko donode, A•chik ma•giparang maiko dake nokdangko chalaigen. “Chinga ma•gipa dolde darang chakjaoba A•chik ma•giparangni namgnina dakgrikangaigen, kenjawa, licence gri badinggiparangko sandiaigen” ineba parakataha.
WTO-ni President Monikha Momin, ma•giparangna licence tarie on•gen ine tangka 9000-ko ra•enga ine Tamanchi Niktera minggipani social mediarango gipataniko raken jegalataha aro indake talataniko on•atengon, “Anga darang ma•giparangonikoba licence tarina tangka ra•a dongja. Angni tangka ra•ako sakkiko on•na nanggen, sakki on•na man•jaode, Tamanchi Niktera WTO-na dai gamna nanggen aro rim•na man•esa dongen” ine parakataha.
WTO iani bidingo Pritam aro Dalseng-ko ching baksa bakrime ja•ku de•pachina okgamahachim, indiba uamang re•bajaha. Uamang an•tangtangni dukni salosan ma•gipa dolko jakkalaia, da•o ma•gipa dolni nangnike okgamskaode knachakjaha, uni gimin Pritam aro Dalseng licence gri biri badinggiparangoniko man•ani dongama ine Monikha Momin sing•doangaha.