Tura, July 23, 2022: A•dokni Skotong Minister Conrad Sangma, Sukrobar attamo chadrapaniko re•anggipa February jani POCSO case baksa nangchapatchina ge•etaha. Chinga pilak case-rangon melie nangrime kamrangko ka•enga aro chinga sing•sandina okamatgenchimoba jechakgija re•angronga. Indide ua batanggimin case-koara pulisrang maini gimin mijal salo chadrapgipa baksa nangchapatenga ine Bernard Marak sing•doangskaha.
Pulisrang angni baganko chadrape sandiani ja•mano angni ma•gipani nokchiba re•ange angko sandieaha, uamang angko tol•e ong•gija case-o gale rim•na jotton ka•enga ine Bernard Marak parakataha.
Pulisrang Skotong Minister Conrad Sangma-ni ge•etaniko man•ne, maming warrant gri angni baganona aro angni ma•gipani nokona re•ange sing•sandiaha. Ia warrant gri raid ka•anio a•jani Deputy Commissioner Swapnil Tembe aro Superentindent of Police VS Rathore-ba dongpaaha. Excise Department-ni manderangsa raid ka•ronga, indiba angni bagankode bil gnanggipa manderangsa raid ka•angaha. Angni bagan maming dakeba Municipal areao ga•akja. Ango beben Licence dongja, indiba angade a•jatangni saksa mandesa aro uan angni bregimin bagansa ong•a. Angni baganko pulisrang brothel ba me•chikrangni denggu dakram nok ine aganaha, indiba ian ong•srangja. Pulisni rim•e ra•rikgipa manderang maming dakeba an•tangtangko denggu dakja, uamang ripengskarang baksa an•senge rona re•anggiparangsa ong•a. Unbaksana angni kangal cholgri bi•sarangko poraiatenggipa bi•sarangba ua bagano gnang, ua bi•sarangko pulisrang be•entangko pale ong•gija kamrangko ka•enga ine tol•e potdraenga.
Conrad Sangma saksa a•dokni dilgipa ong•e, indakgipa kamrangko ka•china ge•etna krachongmotja. Ua angko aro angni nokdangni manderangko ku•chinge roenga. Bang•bata manderang NPP dolo ka•dongna man•jaengaha aro re•baenggipa 2023 bilsio uamang bang•a seatrangon chejawaha ine ma•sisoe gipinko galonna jotton ka•e kamrangko ka•enga. Raid ka•na walsa skang aro raid ka•ani walsa ja•man, NPP dolna chakgipa manderang angni gimin poster-rango ong•gija kattarangko see ramani pakmarango tape donaha. Ia raid ka•ani gimin bang•a NPP dolna chakgipa manderangan gimikna skang koborrangko social mediao gipataha, maina ia koborko NPP dolni chalaienggipa Hub News-sa gimik darangna skang mediao koborko on•chengaha. NPP dolni dilgiparang aro una chakgiparang angko aro angni nokdangni manderangko ong•siatna jotton ka•e kamrangko ka•e, uamang niamko jaktango ra•aha.
Skotong Minister Conrad Sangma-ba ringa, cha•a aro party ka•a, unbaksana una chakenggipa bang•a manderangba an•tangtangni Wine Store donga aro Bar-rangko chalaienga indide Skotong Minister-ara uni ning•o donge kam ka•enggipa manderangni kamkode raid ka•na man•skajama ine Marak sing•doangaha.
Conrad Sangma an•tangan noktango ringe cha•e party ka•na man•genchimode, a•dokni manderangara man•skajama? Meghalaya a•dok Tribal-rangni a•doksa ong•a aro ringa cha•a skang Atchu Ambi chasongonin donga, indide Conrad Sangma-ara mainasa ua niamko galna jotton ka•enga. Bia an•tang ringna man•ode, maina a•dokni manderangko ringna champengenga. Angni personal image-ko ong•siatna jotton ka•aniara Conrad Sangma-ni chanchiani apchonako mesokaha ine Bernard Marak agan talatskaha.
Uasan ong•aigija NPP Youth Wing non-scheduled jolrango patta tarina on•jani gimin, angni bimingko ra•e lekkarango see pakmarango tape kal•steke roenga. Uamang schedule jolrangko non-scheduled jolona tariatskae patta tarina on•naniko nangnikenga. District Council-ara maikai Schedule arearangko non-scheduled areaona tariatna man•gen? Ian Tribal Community-ni kosako re•a gita ong•a aro sixth schedule-ni niamko pe•a gita ong•a. Chinga BJP dolrang NPP dolni pilak ong•gija kamrangko jinmana parake on•enga, iani a•selo NPP dol BJP-ni bimingko nosto ong•atna jotton ka•enga. NPP dol Meghalaya a•doko sason ka•enga, iani gimin uamang niamrangko an•tangtangan bikotdrana man•gen ine chanchienga. Ua BJP dolni sakgni MLA-rangni kosako an•tangko donna krengenga, ua AL Hek-ni grigipana Ticketko on•ne Mamasako susagrikatna am•enga. Uasan ong•aija, ua Shanbor Shullai-koba ong•gija kamrangko ka•enga ine tol•e potdrake roaha. Manipur a•doko NPP dol chejani a•selo, uamang an•tangtangni ka•onangako Meghalaya a•dokni BJP dolosa galskaenga ineba ua agandapataha.