Tura, July 24, 2022: West Garo Hills a•jani Skotong Songjinma Tura-ni MDC Bernard Marak an•tangni janggiko jokatna jotton ka•enga ine parakataha.
“Anga pulisrangoni kate jokjaenga, indiba anga an•tangni janggiko naljokatengasa. Pulisrang angko goe ba encounter ka•e galna am•enga ine anga koborrangko knasoaha. Angni baganko raid ka•ani walo, Tura-ni OC angna call ka•atenba angko Shillong Sadar Pulis Station-o bame on•china ge•etaha. Indake angni ong•katmiting somoio, walni 12 bajimango Bethany Hospital-ni ramao Bolero bolgni aro gypsy bolsa angni gari sepangona re•baaha. Ua garini ning•o IGP, Mukesh Kumar Singh donga ine anga ma•sia. Uamang angko goe galna am•enga ine koborko knasoani gimin anga an•tangko naljokatna donnuaha. Koborko knasoani gitade, MK Singh aro VS Rathore Skotong Minister Conrad Sangma-ni manderang ong•a aro uamangko a•dokona rimnapbaaniba ua an•tangni kamna jakkalasa ong•a. Conrad Sangma uamang sakgniko jakkale angko aro BJP dolna chakgiparangko so•ote galchina ge•etaha” ine Bernard Marak u•iataha.
Indake ua walo, anga MK Singh-ko nikon uamang Skotong Minister-ni ge•etako man•ne angko so•otna re•baaha ine ma•sie, anga an•tangko naljokatna gariko saljite kataha. Ua angko so•otna re•bajagenchimode, ua maina angni dongdipgipa biapo dongdipaaha? aro DGP-ni statement on•gipa video-on, ua angko Shillong aro Guwahati-o track ka•enga ine parakaha.Angni janggiko bon•atna ku•chinge rogipa manderang bang•ani gimin, anga an•tangko naljokatna ua walon ong•katbaaha. Re•anggipa 2014 bilsio, MK Singh angni sak 4 manderangko Darengagal-o ong•gija so•ote galaha. Ua Tura-o SP ong•miting somoio angko bang•a changon goe galna jotton kaaha. Jensalo ANVC a•dok sorkari aro ma•mong sorkari baksa soi ka•gimin, Agreed Text for Settlement (ATS)-ko dal•e ra•jaha. Anga sorkari baksa ATS-ko soi ka•jok, indiba pulisrang da•ona kingkingba angko ja•rike rokuenga. Anga re•anggipa bilsio Skotong Minister-ni elekka Tura songjinmao MDC eleksino chakate cheaha. Indake angni kam ka•arangko nike, BJP dolna chakgipa manderang Garo Hillso bang•bahani a•sel Conrad Sangma eleksino sirikna kenaha. Angni Shillong songjinmao ong•mitingosa pulisrang angni baganko raid ka•aha aro anga pangnan saksa songreronga ine ma•sie pulisrang angko Shillong-o chadrapna jotton ka•skaaha. Anga janggitangko naljokatna, ong•katbaaha, indiba pulisrang angni re•a doarangko nichokkie roenga. Uamang angni dokkanrangko aro angni baganrangko jilrurue nosto ka•enga, adita nokdangni manderang ua dokkanrangko dake janggi tangpaengachim. Angni poraiatenggipa dos gri me•chik aro me•asarangko, bimangtangko pale cha•enga ine tol•e uamangni name janggi tanganiko
nosto ka•aha.
NPP dol skangonin angko ku•chinge dongenga aro NPP dolchi rikenggipa GHADC-ni Executive Committee-ba angko ma•ekgala. Uamang angni elekkana lakh 10 tangkarangkosan chammaia, indiba uamangni manderangde elekka tangtangna kror 1 tangkarangko man•a.
NPP dol BJP dolkon ma•a channe roenga, indiba uamang ma•tangna kam ka•enggipa manderangkon indakpile kal•steke roskaenga. Uamang Dringga gittimni BJP dolna chakenggipa manderangni a•arangko MP Stadium-ko dal•dapatna ra•sekdraaha. Ia obostani bidingo High Court-o badi ka•ahachim. NPP-chi rikenggipa GHADC-ni Executive Committee, uamangni mamderangnasa a•a pattako on•aha, indiba BJP dolna chakenggipa manderangnade a•a pattakon on•gija kal•ake roaha.
Uamang Politiks-ona angni re•bapilaniko nangnikjaenga, angni re•bapilanichi uamangna dal•a gimaani ong•gen ine niksamsoe uamang gimik cholko jakkale angko galonna jotton ka•enga. Anga pangnan kakketna kam ka•ronga aro anga bebe ra•a ta•raken pilak manderang kakketko ma•sigen. Anga Tura-ni SP-naba mail watate, ia obostani bidingo anga kate chakjaenga ine u•iataha. Angko so•otna am•giparangoni naljokna gita ong•katenga ine ma•siahaon, pulisrang ia investigation-o bakrimgen ineba ua janapataha.