Tura, April 28, 2022: South West Khasi Hills a•jani All Khasi Hills A•chik Federation (AKHAF) a•dokni Skotong Minister Conrad Sangma-ko grongenba South West Khasi Hills a•jako tang•dodapatna aro namdapatna ja•ku de•anngpachina mol•molenba lekka sedoangaha.
AKHAF-ni memorandumo jatapate seatani gitade, Khonjoy songo Block Office-ko songe on•china, sorkarini dakchakako man•gipa bank-ko aro Pulis Outpost-ko a•bachengate on•china mol•molangjolaha.
AKHAF-ni janapatani gitade, Meghalaya a•dok bilsi 50 gapahaoba SWKH a•jao bang•a dingtang dingtang neng•nikanirangko chagrongna nangenga ine u•iataha.
“Ranikor jolrango sorkari kolege ge•samangba dongja, iani a•selo poraienggipa chadamberang Shillong, Mawkyrwat, Mawsynram aro Nongstoin-rangona re•angesa poraina nangengani gimin neng•nikaniko man•enga. Indiba bang•a ma•a parang chol dongpajae detangtangni poraiako dontongatna nangao ga•akenga. Ranikor Civil Sub-Division-ko 2018 bilsion oprake on•aha, indiba da•alona kingkingba Ranikor Sub-Division office-o kam ka•gipa saksamangba dongkuja. A•dok sorkari, sorkari kolege-ko rike on•an baksana a•jani pilak LP Skulrango A•chik skigipako rakkina nanga” ine dabiangaha.