Tura, July 3, 2022: West Garo Hills a•jani District Legal Service Authority (DLSA) Department, Meghalaya State Legal Service Authority (MSLSA)-ni ge•etaniko man•ne, District Rural Development Agency (DRDA), Health Department, District Disability Resource Centre, Social Welfare, ICDS, Agriculture and Horticulture Department baksa nangrimenba Health Camp-cum-Legal Awareness Program-ko ong•atangaha.
Ia program ko Gambegre C&RD Block-ni ning•o donggipa Sampalgre songo ong•atangaha. Meghalaya High Court-ni Chief Justice Sanjeev Banerjee, ia tom•anio mongsonggipa sokgipa ong•e bakko ra•angaha. Unbaksana bang•a songni manderang, A•khing Nokmarang, aro bang•a sorkari Department-ni manderang bakko ra•angaha.
“An•chingni a•song jakgitel ong•ani bilsi 75 gapaha aro sorkari an•chingna bang•a niamrangko ra•gataha. Indita bilsirangna kingking ia niamrangko ma•sijagenchimode, namen gualani ong•gen. Sorkari an•ching pilaknan chanchie niamrangko tarie on•aha, jekai Right to Water, Right to having access to Roads aro bilsi 14-ona kingking Right to Free Education, uarangni bidingo pilakan u•ie ma•sie ra•na nangchongmota. Pilakan an•tangtangni Right-na ku•rangko on•na man•a aro darangkoba mikkang nigija apsan ong•e kamko ka•na nanga. An•ching songsalo me•chikrangko mande ra•achisa tom•tomaniko ra•bana man•gen. Me•chikrangko mande ra•gija onia ka•e jakkalsimaiode maming saloba tom•tomaniko ra•bana man•jawa” ine Chief Juatice Sanjeev Banerjee aganangaha.
Meghalaya High Court-ni Judge HS Thangkiew, Legal Services Authorities Act 1987-ni bidingo jinmana talate on•angaha. Indake cholgrigipa manderangna free legal service-rang gnang ineba aganangaha.
West Garo Hills a•jani Deputy Commissioner Swapnil Tembe, sorkarini sualenggipa scheme-rangko man•na gita Aadhar Card, Epic Card aro Bank Account dongna nangchongmota. Unbaksana ua Sampalgre songo chagrongenggipa neng•nikanirangko namatna kamko ka•anggen ineba aganangaha.
DRDA Department-ni Project Director, MT Sangma, kangal cholgri manderangna sorkarini sualenggipa scheme-rangni bidingo agantalate on•angaha. Unbaksana
District Medical and Health Officer, Dr. Bijoy Debbarma an•o ke•ani, bi•sa an•pakani aro bi•sa bakgitchako simsakani bidingo agan talatangskaha.
Gambegre C&RD Block-ni CDPO, Integrated Child Development Services (ICDS)-ni ra•gatenggipa scheme-rangni bidingo agantalate on•angskaaha.
Indake ia tom•anio WGH a•jani District and Session Judge, DR Kharbteng rimchaksoani kattarangko agansoaha, DLSA-ni Secretary aro Chief Judicial Magistrate MK Lyngdoh mitelpilani kattarangko aganangskaaha.