Tura, July 1, 2022: Batanggimin 2020 bilsini March 14 tariko, Tura Women Pulis Station-o badi ka•ani gitade, Rasthy A. Sangma bilsi chu•sokgijagipa me•chik bi•sako an•tangni dongram noko bilsisa mangna kingking drae til•eke roaha.
Rasthy Sangma-ni kosako Tura Women PS-o Case no. 16(03)2020 u/s 5 (n)/6, POSCO Act-o pangchake badi ka•aha. Indake badi ka•ani bidingo talbate sing•sandianiko dakchina Tura Women Pulis, SI Salmay R Marak-na pakwatataha. Salmay Marak sorkarini dongimin niamo pangchake sing•sandianiko dakaha aro May 12 tariko badi ka•gipani bidingo sandie man•gipa chargesheet-ko on•aha ine parakataha.
Indake Court-o trial-rangko matchotani ja•man, WGH a•jani POCSO Court-ni Special Judge, Rasthy A. Sangma-ko dos dakaha ine parakatenba POSCO Act 2012-ni Section 5 (I)/(n)/6-o pangchake sastiko man•gen ine u•iataha.
“Dos dakgipa mandeko bilsi 20-na pattoko ba Rigorous Imprisonment (RI)-o donata baksa tangka gong hajar 25-ko dai gamchina ge•etaha. Ua tangkarangko gamna man•jaode pattoko dongani bilsiko jadokna ra•dodapatgen” ine POCSO Court-ni Special Judge parakataha.
Uasan ong•aigija Rasthy A Sangma, Tura Women PS Case no. 44 (10)2016 u/s 376 IPC r/w 6/10 POSCO Act-o pangchake badi ka•gipao bak donga ine rim•a man•aha. Ia obostani bidingo 2021 bilsini November 21 tariko chargesheet-ko on•aha, indiba court-o da•onaba trial ong•engkua ine u•iataha.
Uandake 2016 bilsini October 4 tariko, Tura Women PS-o koborko man•soani gitade, saksa Beatbeat Ch. Marak me•chikma saksani bagan tangoniko me•su ra•na re•angmiting somoio uko drae til•ekaha. Dos dakgipa Beatbeat Ch Marak, ia obostani bidingo darangnaba aganjachina dagrange ka•mikenatahachim. Koborko man•soani bakan ia obostani bidingo Tura Women PS-o 43/10/2016 u/s 323/376/506 IPC-o mamlako segataha aro ia case-ko Women Pulis, SI Renu D Momin-na pakwatatskaha.
Indake ia obostani bidingo sing•sandianiko dake 2017 bilsi July 31 tariko chargesheet-ko on•aha. Ia mamlako Court-o Trial matchotani ja•mano, District aro Session Court-ni Judge uko dos gnang ine parakataha aro IPC Part ll Section 323/376(1)/506-o pangchake sastiko man•gen ine parakataha.
“Beatbeat Ch Marak-ko kamni kri bilsi 7-na pattoko ba Rigorous Imprisonment (RI)-o donata baksa tangka gong hajar 10-ko dai gamchina Section 376 (1) IPC-o pangchake ge•etaha. Unbaksana Section 506 IPC Part ll-o pangchake Court uko bilsi gnina Simple Imprisonment (SI) aro 323 IPC-o pangchake Simple Imprisonment (SI) bilsisana donatgen” ine u•iataha.