Tura, July 3, 2022: West Garo Hills, District Disaster Management Authority-ni ong•atanggipa Upscaling of Aapda Mitra Scheme-ni skanggipa changni trainingko matchotanina Sonibar salo Tura Dakkopgre-o donggipa SMELC Building-o mittelpilani ba Valedictory program-ko ong•atangaha.
Ia program-o West Garo Hills a•jani Suprentindent of Pulis, Vivekanand Singh Rathore mongsonggipa sokgipa ong•e tom•anio bakko ra•angaha.
“Je a•sel ong•anirango Pulisrangsa skanggipa sokchenga, indiba da•o skia man•gipa Aapda Mitra Volunteer-rang donganichi uamang gittimtangtango aro sepang jolni biaprango je a•sel ong•genchimoba, ta•raken dakna nanggni kamrangko ka•angna gita man•gnok. A•sel ong•ani somoio aro a•sel ong•ako nikgenchimode, saksa sakgipinna kobor on•grikanichi namgipa dakchakani ong•a. Uni gimin chadamberang VHS set-rangko nama kamna aro saksa sakgipinna dakchakna aro kobor on•grikna jakkalna nanga. VHS set-rangko gimaatgenchimode, Authority-ni manderangna ta•raken kobor on•na nanga” ine SP Rathore aganangaha.
A•sel ong•anirangko nikgenchimode, somoi re•atgija ta•raken kobor-rangko Department-ni manderangna sokatna nanga, jedakode darangni janggiba gimajawa. Aapda Mitra Volunteer-rang rakbee kam ka•anichi a•dokna aro manderangna bang•a namgniko ra•bagen ine SP ka•dongsoenga.
Una agreba West Garo Hills a•jani District Disaster Management Authority, James D Sangma-ni agananga gitade, Aapda Mitra Volunteer-rangni trainingko June 23 tarikoni a•bachengate July 2 tariko matchotataha. Indake Tura, Dalu aro Rajabala-ni manderang ia trainingo bakko ra•angaha.
“Natural Disaster Management Authority, central scheme-ko ra•bana chanchienga jeon gittimni volunteer-rangna trainingko on•anggen. NDMA a•ja ge•prakoniko sak 200 community volunteer-rangna training ba skie on•na miksonge kamko ka•enga. Ia trainingni skanggipa phase-o sak 50 manderangna skie on•aha. Uandake gnigipa phase-o sak 150 manderangna skie on•anggen” ineba u•iataha.
Ia trainingo bakko ra•anggiparang Chegrik Marak aro Salsime Marak uamangni changa sapaniko aro skie ra•aniko jinmana aganprakangaha. Indake tom•anio song ge•prakni volunteer-rang bang•a jokataniko ba rescue operation-rangko jinmana dake mesokangaha. Indake SP ia tom•anio nambate dakmesokanggipana boksis aro certificate-rangko on•angaha. Best Volunteer Award-ko John R Marak man•angaha, gnigipa award-ko Banlem Ch Sangma, uandake gittamgipa award-ko Salsime Marak man•angaha.
Ia tom•anio Additional Deputy Commissioner, DDMA, Dolrich Berlin Ch Momin, Deputy Comptroller, Civil Defence Inspector S Sangma, MPRO B Mallick, aro dingtang dingtang Department-ni Officer-rang bakko ra•angaha ineba u•iataha.