Tura, March 12, 2022: “Horticulture for Sustainability and Food Security” ko katta bichong donenba State Level Horti Exhibition cum Honey Festival-ko Sonibar salo West Garo Hills a•jani Tura Dakkopgre-o donggipa SMELC building conference hall-o ong•atangaha.
Ia Exhibition cum Festival-ona West Garo Hills-ni Deputy Commissioner (DC) Ram Singh mongsonggipa sokgipa ong•e bakko ra•angaha. Ram Singh tom•anio jinmana aganprakengon indakgipa exhibition-rangko ge•e game cha•enggipa manderangna nangchongmota, uamang exhibition-rango an•tangni changa sapachi tarigimin bosturangko jinmana mesokangna cholko man•a.
Horticulture-ni ning•o bang•a dakna man•gni kamrang gnang, na•simang an•tangtangni wilwilao donggipa ma•manti sam bolrangko nosto ka•gija ripingkamna miksonge jinma apsan bakrime bagan barirangko dakna man•gen. Gue baganrangko dakanichi a•jani bang•a a•arang aro ma•manti sam bolrang nosto ong•atako man•engaha, gue an•chingna mamingkoba on•pilja inede ong•ja, gue an•chingna tangkarangko on•pila, indiba tangkarangko bang•bate man•na an•ching gue baganrangko dal•dapatode, uan an•chingni buring bolgrimko nosto ka•a.
An•chingni a•doko bang•a a•arang aro biaprang gnang, an•ching jinma apsan melie pale sime cha•na man•gipa me•surangko ge•naba man•gen. Garo Hills-o Anaemia sabisiko man•gipa bang•a bi•sarang gnang, ia sabisiko namatna ma•a paarang detangna chu•onga gita cha•anirangko simsake on•na nanga. Uni gimin Health Department-ni Officer-rang ia sabisini bidingo nirok sandichina mol•molna sika aro ma•a paarang me•surangko ge•e game nama cha•anirangkosa detangna on•china didina sika ine DC aganangaha.
WGH a•jani District Agriculture Officer aro Horticulture Department-ni Incharge, Purnima K. Sangma, Horticulture Department-ni gamchataniko jinmana aganprakangaha.
Horticulture department pul, me•su, bite ba uandakgipa cha•ani bosturangkosan ong•aigija bang•a manderangna kamrangko on•a baksana cha•ani ringanirangko ru•uta bilsirangna soatgija ripinge donnani kamrangko skie on•enga.
Bija bitchiko an•ching salantion nanga uni gimin manderang bijarangko jille bitchirangko bikote uko pale sim•e tangkarangko kamaina man•gen ineba aganangaha. Uasan ong•aigija Agriculture Department-ni Joint Director Allinaro Ch Momin, EGH-ni District Agriculture Officer Jitendra Prasad Barma tom•anio aganprakangaha.
Garo Hills-ni saksa mingsing minggamako man•gipa Te Mikhail Marak-ba ia tom•aniona re•bae an•tangni git “Hai Chena” ingipako jinmana ring•e on•angaha.